Toshi Wungtung-i Col. R.S Rathore den ajurutep

Dimapur, Monupii (May) 4 (TYO): IPR, SCERT & Village Guards Advisor, Toshi Wungtung-i Monupii (May) 4, 2018 nü New Delhi nung Union Minister of State for Information & Broadcasting and Youth Affairs and Sports, (I/C) Col. Rajyavardhan Singh Rathore den ajurutep.
Iba mapang Toshi-i Union Minister of State den Nagaland nung department indang osang lemsatep.
Paisa Minister Rajyavardhan Singh dang Nagaland nung timtem ajuruba olen kar ashidang meta talang pilar aliba tesemtem nung communication, community radio programme aser FM channel tajungba kümdaktsütsü atema special high frequency tower tem amenoktsü atema mepishi.
Toshi-isa Union Minister dang IPR tajungba kümdaktsütsü atema Nagaland kübok district ajak nung sub-centre yanglutsü aser centre temji (Headquarter) Directorate office, Kohima den sendakteptsü atema mepishi.
Advisor Toshi-i ashiba onük ajakji Rajyavardhan Singh-i süoki ia anga aser pai Nagaland nung IPR department ajungkettsü atema tebilembatem lemsateptsü atema maneni ajuruteptsü nangzük.