Steven Gerrard Rangers Manager kümogo

London, Monupii (May) 4 (Agencies): Rangers puri Rogonü taoba Liverpool aser England midfielder Steven Gerrard parnok manager tasenba asütsü shimba sangdongogo. Gerrard-i iba club den küm pezü atema tezüngzüktepba ka yangluogo.
“Ni Rangers indang manager mapa agizükba atema kanga pelar. Ni iba club ya kanga akhümtsübur,” ta Gerrard-i club indang website nung zülutsü.
“Ni iba club nung inyak tenzüktsü asoshi matateter aser club-i tang tashi nung ajangteter aliba dang nungi takok timba ajangtettsü asoshi onoki merangtsü,” ta paisa ashi.
Chairman Dave King-i ashiba agi, “tetenzük nungi onok tsüngda tangatettep nung jembishisnüa aruogo aser Steve ya Ranger pur tejakleni anir aotsüba atema tetemsü, ta amanger.”
Gerrard, taoba mapang nung Liverpool Under-18 team den inyakogo, saka pa asoshi iba mapa nung tasen lir aser Celtic den tokteptsüba atema mapa melarabo masütsü.
Amungnü Celtic puri goal 5-0 agi Rangers koka Scottish Premiership title tenetbenbuba atonga kokogo.
Rangers pur 2012 küm asaya nungi aginba aser iba sülen Scottish football fourth tier-i ludaktsüba nungi ano kangajungabo meshilangi lir.
Scottish football top flight-i atur season tanabuba nung parnoki Celtic pur point 13 agi memenepi lir aser tanabuba jenjang nung tembangtsü asoshi Aberdeen aser Hibernian den kanga toktepa asayadar.
Caretaker manager Graeme Murty shiba club indang under 20 team coach aliba nungi Club manager asütsü asoshi ajungketja liasü, pa ita trok sülen mapa nungi anentsüogo.