Table Tennis World Championship: Korea team lomgjemtsü

Monupii 04, 2018 (Agencies): South Korea aser North Korea linük anaprongi tang tasayidak aliba table tennis world championship asayamung quarter-final nung team ana ya kati ka den metoktepdaktsütsü atema telemtetba agiba sülen Korea linuk anaprong nungi tetsür team longjemer asayatsü, ta Yangtepnü (Thursday) International Table Tennis Federation (ITTF)-i metetdaktsü.
Iba asayamung semi-final nung North aser South Korea team na sentepa team ka sür asayatsü atema mepishiogo. Rogonü (Friday) Sweden, Halmstad nung Korea team-i Japan team den asayatsü.
Taoba table tennis world championship asayamung nung Korea team longjema asayaba ya 1991 küm Japan, Chiba nung asütsü. Iba asayamung tetsür final asaya nung Korea tetsür team-i defending champion, China tetsür team madak takok ngutetta gold medal ngua liasü.
‘Unified team’ ka tentettsü atema North aser South Korea tanishir, Table Tennis team anaprongla aser ITTF tsüngda ‘tripartite agreement’ (tetezü telok asem pangjemba) agia liasü.
” Linük ana team longjemba indang osang ‘Board of Directors’ nem metetdaktsü aser delegates temi iba putiotsü tanaben yanglushiba pusemba temaitsü sayua parnoki nokdaka teka maa ‘unified team’ agizük,” ta ITTF tir, Thomas Weikert-i ashi.
Japan tsür Mima Ito-i ashiba agi Korea team ana longjemba ajanga ‘last four’ asaya nung Japan team nem kecha timtem magütsütsü.