BJP candidates aika ozüng alema inyakertem lir: Rahul

New Delhi, Monupii/May 05 (Agencies): Ato kilonser, Narendra Modi aija Congress Party Tir, Rahul Gandhi-i, Bharatiya Janata Party (BJP) lenir aika anema ozüng alema inyakba kenotem lir, ajisüaka Ato kilonseri iba atemaji ola madoker, ta aitsü.
Rahul-i twitter ajanga, “Temeim Modi, nai o kanga jembir. Ajisüaka timtem kaji, nai jembiba aser inyakba na meputeper. Karnataka nung shimba ner candidate yangi angur,” ta shia video ka ajanga, Ato kilonseri “Reddy brothers gang” nem party ticket 8 agutsüba atema minute 5 jembitettsü asü, ta asüngdang.
Iba video ji “Karnataka’s Most Wanted” shilem ka mesüka lir.
Video ajanga Rahul-isa, “Ochimashi, ashioktsüba aser külakkübong ken o 23 alisang ka ner Chief Minister candidate kümdaktsür asü? ner tongti lenir 11 anema ochimashi kenotem aliba indang nai kodang jembitsü?,” ta asüngdang.
Iba video clip nungji ozüng alema inyakba ken o alir BJP candidates- B. Sriamulu, G. Somashekara Reddy, T.H. Suresh Babu, Katta Subramanya Naidu, C.T. Ravi, Murugesh Nirani, ES EN Krishnaiah Shetty Malur, K. Shivanagouda Naik, R. Ashok aser Shobha Karandlaje nunger tetshia lir.
“Reddy adianutemi ozüng alema iron ore atuba ochimashi sen crore 35,000 nembangtsür. Nü dang nungi telangzüba atar. Temetettsü: Telangzüba angutsü atema nai osangkaket ka nung reprangtsü akok,” ta Congress Tirisa metetdaktsü.
Züngsem 224 aliba Karnataka Assembly atema election Monupii/May 12, 2018 nü agitsü aser Monupii 15, 2018 nü election osang sangdongtsü.