Trump -Kim senden amentsü tesem shimteta lir

Washington, Monupii 05 (Agencies) : Otsü asütsüsa North Korea den temaba jenjang nung senden amentsü atema anogo/mapang aser tesem shimteta lir, ta US Tir, Donald Trump-i shiogo, saka sendenji kodang mesüra kong alitsüar tang tashi pai sapoka memetetdaktsür.
Aji oda süaka, Trump aser South Korea Tir, Moon Jae-in na senden balaka amentsü indangbo White House-i tejangja sangdongogo.
Korean tzümeketli dak sendakba nung linük ana tsüngda tesendaktep tajung yanglua alibaji maneni tejakleni bener aotsü nükjidong nung Trump o Moon na tan Monupii/May 22 nüji White House nung ajurutepa senden amentsü renemogo.
Taoba Rogonü Moon aser Kim Jong Un na otsü asütsüsa senden amenba sülen ano tang US Tir o Moon na senden amentsü.
US Tiri North Korea lenir den temaba jenjang nung senden amentsü aliba indanga tena senden amenba mapang lemtepa jembitsü, ta kasa osang ajanga metetdaktsüogo.