Mars limai anünglak kol kaketa yokogo

Vandenberg Air Force Base, Monupii 05 (Agencies) : Tanü Kuptoknü NASA-i InSight ta ser anünglak kol ka Mars limai apusoa yokogo. Iba anünglak kol jagi tongtibangsa Mars nung menoknok anokba indang tejangjaba metettsü.
Atlas V rocket kolak nung amenoker iba anünglak kolji tanep züngia aliba mapang (4:05 am Pacific time) Vandenberg Air Force Base, California nungi kaketa yok, ta Nasa commentator-i metetdaktsü.
California nungi kanga junga kaketa atuba sülen Atlas V (five) rocket jagi Mars InSight-ji mapang tatsüka atema asenok aliba lima (earth) anasa anendaktsü. Ajiser ghonda ka lir anünglak kolji Mars tsütsüi kaketa yokogo.
Sen US dollar 993 million endoka inyakba project ya ajanga Mars indang tejangjaba metettsü aser iba lima jagi meimchir yoktsü ajung asü masü mesüra küm billion aika tejaklen akümba lima koba long agi sünga lir, iba planetji koma item indangji tejangjaba kuli angutsü.
Sentong yanglur inyakba ama ajak shidak ataloka ora Yimpoksüi/November 26 nü anünglak kolji ‘Red Planet (Mars)’ atongtsü ta bilemdagi.