Assam nung Zeme Naga nunger ‘Framework’ nung adentsüla

Dimapur, Monupii (May) 5 (TYO): Assam nungi Nagaland ta razüka maodang Tuensang Hills ta ser dang district ka dang liasü aser iba nung Assam nung Zeme Naga nungertem dena liasü.
Mezüngbuba Naga sub-divisional headquarter ji Asalu Zeme Naga lushi nung yanglu aser ibaji tang Dima Hasao district, Assam nung lir. Ajisüaka, 2009 küm Dimasa aser Zeme Naga nunger tsüngda ali aser temeten atema obang meputepi rara adok aser idangji Zeme Naga nunger 56 taküm sama, ta Zeme Council NEI tir Raitu Elu Ndang-i ashi.
Zeme lushi kümzüka ayutsü atema taküm bendanga agütsür parnok nisung 56 bilemteta Asalu nung ‘Martyr’s Column’ ta ser lung ka azünga ayu aser ibaji Rongchii (April) 25, 2018 nü saya. Iba sentong nung Dima Hasao Deputy Commissioner Amitabh Rajkhowa aser North East Zeme Naga nunger lennir aser tainten aika aden, ta paisa shisem.
“India (GoI) sorkar aser NSCN (I-M) tsüngda “Frame work” agreement agitepba nung Assam nung aliba Zeme Naga nunger maden aser iba ya Naga nunger ka longjemtsü ta asüba taginüba matonger. Iba inyakyim ajak onoki Naga nunger atema bendanga agütsüba ajak züngdokba sayur,” ta Raitu-i ashi.
N.C. Hills (Dima Hasao) nung nütsüng yongsük teimba rongnung tanabubaji Zeme nunger lir aser tanga Assam nung Zeme Naga nungertem züngdokbaji putiotsü nung aibelen tulu ka asütsü. Talisa tarutsü anogotem Naga nunger ajak ka küma longjemtsü atema yamai maongka joko mangutsü akok, ta paisa metetdaktsü.
‘Framework’ nung onok medensemba atema mepelar aser iba ya onok temeten aser akhüm züngdokba ama onokibo züngshir. Anungji, Zeme Council North East India-i iba ken o nung sendaktepa alirtem dang Framework meyipa reprangshitsü aser Naga nunger ajak tenüng nung talisa Assam nung Zeme Naga nungertem atema bilemja, onok dendaktsütsü ayongzüker, ta paisa ashi.