Meputep maremtsüla

Tanü tensa asen lima nung asenok putepa linüyonga meputepdaktsüba mapa kaji election agiba ya asütsü. Atangji, pei angatetba yari yimten telok ka nung adenba mesüra pei mulungba nisung ka yaribaji tim dang lir, iba jagi asenok rongnung meputep adoktsüsa asenoki tebilema mebilemtsüla aser teinyaka meinyaktsüla. Ajisüaka, asenoki aiben election mapang takok ngunüdang tashiyim aser ochimashi mapa inyakbatem ajanga kinunger-medemer aser yimtsüryimertem den meputepba dang masü saka tsükchir ayimer. Atangji, tashiyim agi masüba mapatem inyaknungji mesüra jembiba ama mesüi mapa agi ashioktsü nungji aiben jashiteptsüsa adoker, ajisüaka yimten nung itemjia yimya ka ama dang bilema, nübortemi dang masü saka election-i aiertemi dena shisatsü tesadem agi tarutsü asoshi bilema nübortem putepa alitsü asoshi inyaktsübajiang tongtibangba akümer. Asenok aikati election ya alima tatem amai bilemer, iba jagi election agiba dak alaka tanga tajung aser tamajung kecha mangur. Iba ama tangatetba aliba agi election nungbo nisung aika taaktsü maket akümer. Aji oda, nisung dak tamajung inyakdang aakba shisatsü samanungji Tsüngrem tenzükertemi dena election mapangbo ochimashi mapa inyaktsü kecha menungnangi jakdaka inyaker. Iba kasaji nübortem nem tangatetba shisatsü tajung agüja anitsüba lenirtemiang anir lanurtem taküm aser parnok tarutsü jenjang raksatsüsa inyaker. Ibayongji, election ajanga asen lima yanglutsü melen raksar aser party balala asüyongbo putepa alitsü melen tsükchir akümer. Item ajakji asenok meshitaki aliba ajanga mazükmaru tenzüker ta asenoki angatettsüla. Joko, asen lima nungbo election ya akhidang tetsü tebuo mapang lepteptsüngtepba mapatem dang nungi tamajungba kümogo. Tetsü tebou mapangbo yimer o yimer na tsüngdangbo tsükchitep madok saka yaritepa ali. Tanü asenok election agiba ajanga asenok taküm, kibong, lokti, arogo aser yimten akoksaba ya reprangdangra kangasa ulura aser kanga bilemdangtsü nüngdaker. Putepa aser yaritepa alinungbo tanurtem ajak tajung kümdaktsütsüba agi aser ajak anisüngzüka alitsüba agi asenok o asenok na meputepi kati ka arishitepdang shinga tajung maküm aser shinga jenjang tajungba ka meyanglutet memeteti asenok tantsür tambur akümer aser alima nungi pilar. Putepa alitsüba asüyonga mesüra meputepi alitsüba asüyonga tangar dang nungi temelaba agitsü menüngdaker. Putepa alitsübajia asen mulung aser meputepi alitsübajia asen mulung, anungji asenoki shimtettsü. Iba jagi karibo peisasa ajak den putepa litetter, itemji tenükshitsüka saka ano karibo peisasa shinga dena meputepi alitsü meranger amato alir, item takümtemji temiemtsüka aser tesasatsüka lir. Taküm nung tepela ya tangar den puitepa aliba nungi arur aser tepelaji taküm ka asoshi mozü tajungtiba. Aji oda, asenok putepa melitetba ajanga asenok shinga pelaa malir aser asen lima renloka aotsüba agi moudaktsü soita ayur. Atangji, tamajung inyakertem den putepa alitsübaji tasak saka item denji putepa litetbajiang jenjang tulu aketba mapa asütsü. Tajung aser shitak inyakertem den puteptsübajibo melamelar, anungji jenjang tasak masü. Iba tangatetba nung asenoki asen yim, asen lima aser asenok tarutsü lanu putu meima ajak den putepa alitsü merangtsüla. Karibo pei yimten, lokti aser arogo raksatsüsa akümyonga mapayu meputepi alitsüang merangtsü. Item dakji pei lima aser nübortem meimba shisatsü mali ta angatetdi. Ajisüaka, tetsü kati pei chir tetepsetang tepseta meindoki tangar tetsürla nem agüjang ta Solomon chuba dang shitetba shisatsüji asenok ajak dak alitsüla. Joko, election temer ita asembuba, anungji government nung alirtema pei teinyaktsü aritepa inyakba mapang lir. Ajisüaka, asenok nübortembo tesem aika nung ano tangang election agir amai asenok o asenok na meputeptetba agi pei mapaa junga meinyaktet takoksa aser tetsübu tia nung aliba angashir. Item ajakji asenoki meputep aremba ajanga lir. Meputep arembaji tamashi, iba jagi asenoki taküm, kibong aser lokti telongi ludaktsür. Pei tetsü taso lima aser nübortem meimeribo pei yimer aser pei nübortem den meputepi alitsübaji maremtsüla.