Mizoram nung ak 1029 süogo; Ak 3,639 tashidak agi tonger lir

Aizwal, Monupii (May) 7 (Agencies): Mizoram nung Metsüremi (March) nungi porcine reproductive and respiratory syndrome (PRRS) tashidak prokshia ak tajemba agi 1,029 shi süogo aser 3,639 shi iba tashidak agi tonger lir.
State animal husbandry aser veterinary department ketdangsertemi ashiba agi, PRRS tashidak ya Mizoram-Myanmar arrtsü nung Champhai district kübok Zokhawthar yimtsüng nungi Metsüremi (March) 17 nü tenzük.
Iba yimtsüng nung aliba ak 12 nungi blood samples agizüka liasü aser ak 11 dak PRRS tashidak aliba Disease Investigation Laboratory nung Metsüremi (March) 21 nü tendangba sülen ngutet. PRRS virus ya yimtsüng 91-i prokshiogo, ta ketdangsertemi ashi.
CSF aser PRRS tashidak ya Mizoram kübok district ti prongla nung prokshia lir, saka Aizawl, Serchhip aser Champhai district tem nung tali bulua lir.
“Metsüremi (March) nungi tenzüka Ak tulu aser techanu 1,029 asüba osang district balala nungi angazükogo,” ta animal husbandry aser veterinary department joint director (livestock health) Hmarkunga-i ashi. Paisa veterinary doctor tem iba tashidak agi tonger aliba tesemi tensa asadangtsü asoshi yokogo, ta ashi. Metsüremi (March) nungi tenzüka Rogonü tashi nung blood samples 245 bo tendangogo aser item rongnungi PRRS agi ak 133 aser CSF agi ak 99 tonger aliba ngutet. Lunglei aser Champhai district magistrate-i tawa Myanmar nungi ak tetsüti aser techanu bener marutsü asoshi tenokdangba agütsüogo.
National Institute of High Security Animal Disease Laboratory, Bhopal nungi central assistant commissioner aser mongintemi Serchhip tesem semdanga Rongchii (April) 20 nungi 23 tashi ak tem anepalua asadangogo.