UP nung sugar mill ochimashi ken o CBI-i bushisüngdangtsü

New Delhi, Monupii/May 07 (Agencies): 2010-11 küm linük meyong sugar mills 21 deinvestment ajanga state sorkar sen crore 1,179 takoksa anguba ken o CBI nem bushidaktsütsü atema bendanga agutsüogo, aser iba osang ya ajanga taoba Uttar Pradesh chief minister, Mayawati timtemi aitsüa akok.
Mayawati-i aniba sorkar nung (2007-2012) minister aser Mayawati den külemi inyaksemer, Naseemuddin Siddiqui-i, “Taoba CM Mayawati aser BSP general secretary, Satish Chandra Mishra na tetuyuba nung sugar mills yokdoka liasü,” ta yaküm metetdaktsü.
Ajisüaka Mayawati-i, sugar mills ayoktsü tetuyubaji Siddiqui-i agutsü, ta ashi. Siddiqui ji tesülen Mayawati-i party nungi agiena liasü.
Iba sülen taküm Rongchii (April) 12, 2018 nü UP Chief Minister, Yogi Adityanath-i aniba sorkari CBI dang iba ochimashi ken oji bushisüngdangtsü asüngdanga liasü.
Iba ken o nungsa company taila amshiba aser Deoria, Bareilly, Laxmiganj, Hardoi, Ramkola, Chittauni aser Barabanki nung sugar mill tenet ayokba documents densema lir.
Osangbenertem den jembidang UP principal secy. (home), Arvind Kumar-i, “Sugar mill 21 ayokba nung ochimashi kar lir, itemji auction süa liasü. Iba ken o bushisüngdangtsü atema CBI nem agutsüogo,” ta metetdaktsü.
Osang angazükba agi, CBI-i sugar mill ayokba documents reprang tenzükogo aser kobi melii FIR benoktsü. CBI-i iba ochimashi ken o nung yimtenren lenirtem, ketdangsertem aser shishilembartemi shilem agia aliba bushisüngdangtsü.
Sugar mills machinery dak alia item mills ji sen crore 2,000 shi jenjang ali tasazük hectare 500 nung yangluba liasü.
2004-05 küm nunga Mulayam Singh Yadav-i aniba sorkari sugar mills 24 ayoktsü sentong liasü, saka high court tiyongtsüi aitba ajanga meyoktet.