CM Siddaramaiah-i PM Modi, Amit Shah anema ken o agutsü

New Delhi, Monupii/May 07 (Agencies): Tanü Congress lenir aser Karnataka Chief Minister, Siddaramaiah-i ochimashi nung ajemdaker pa tenüng menüktsüba atema BJP, Ato kilonser, Narendra Modi, party Tir, Amit Shah aser taoba mapang Karnataka chief minister, BS Yeddyurappa nunger anema ken o agütsü.
Notice nungji Siddaramaiah indang lawyer-i BJP-i yimtenren dak sendakba advertisements agutsüba aser election nüboyim sentongtem nung Ato kilonser, Narendra Modi-i jembiba onüktem shisema lir.
Lawyer-isa, BJP-i yazü ajungkettsür aser Siddaramaiah tenüng menüktsütsü atema olulu jembir, ta metetdaktsü.
Paisa, Ato kilonseri metetsümonga Karnataka Chief Minister anema yazü aika jembiba den tenüng menüktsüogo, ta metetdaktsü.
Notice nungji, “Kü client (CM) aser Indian National Congress Party tenüng menüktsütsü nükjidong nungdang BJP-i advertisements agutsür,” ta shia lir.
Siddaramaiah indang counsel-i, pa anema tai tongloktsübaji yazü, puraba aser yimtenren nung tajangzük angutsü atema lir, ta ashi.
Ato kilonser, Modi aija tanü Karnataka Chief Minister, Siddaramaiah-i Ato kilonseri Vijay Mallya aser Nirav Modi na linük nungi jena odaktsü, ta aitsü.
CM-isa, “Pai (Modi) pa ‘chowkidar’ lir ta ashir. Ajisüaka pai Nirav Modi o Mallaya na jendaktsü; pa ya komala ‘chowkidar’ ka? Pai tajung anogotem arudar ta jembir, saka tajung anogotemji kong lir’? Pai Hindi jembibaji onoki mangatettsü ta pai bilemer, ajisüaka onoki junga angateter,” ta ashi.
Yashia Siddaramaiah-i, Modi-i Ato kilonser office akhümket mezüngshia o jembir, ta aija liasü.
Ato kilonser, Modi-i pa indang office dak mapetba o jembir, ta shia Karnataka CM-i, “Pai (Modi) akhümket o jembitsü ta onoki imlaa liasü. Ajisüaka pai tangateter ka ama masü saka BJP oshi nung jembir. Item oji Ato kilonser kati jembiba o memesük,” ta aija liasü.