Ato kilonser, Narendra Modi-i ‘Modicare’ reprangshiogo

New Delhi, Monupii/May 07 (Agencies): Tanü Ato kilonser, Narendra Modi-i ‘Modicare’ ta ajaba National Health Protection Scheme (NHPS) maparen tenzüktsü atema terenemshiba reprangshiogo, ta ketdangser kati metetdaktsü.
Tanü Ministry of Health & Family Welfare, NITI Aayog aser PMO nungi tongti ketdangsertemi Ato kilonser dang iba scheme dak sendakba balala lemsatepa liasü.
Prime Minister’s Office (PMO) nungi sangdong ka ajanga, “‘Ayushman Bharat’ kübok health assurance programme tekaraba nung tenzüktsü atema tang tashi nung inyaka aliba mapatem Ato kilonser nem metetdaktsüogo, aser item rongnung state tem den asüngdangtepa renemba densema lir,” ta metetdaktsü.
Iba scheme ya ajanga shirangba mapang nung küm ka nung kibong shia nem sen lakh 5 tashi agutsütsü aser iba scheme ya ajanga linük nung sensaker aser timtemer kibong crore 10 dak tema ayimjemtsü nükjidong lir.
Osang angazükba agi, sorkari iba scheme ya taküm Luroi (August) 15, 2018 tashi nungbo renemer liner, aser kasa anogo, Independence Day nung tenzükner.
Iba scheme kübok Ato kilonser, Modi-i sensakertem aser kanga timtemer kibongtem nem tajangzük agutsüner, ta kasa sangdong ajangasa metetdaktsü.
Taoba ita Ambedkar Jayantia anogomong nung Ato kilonseri Bijapur (Chhattisgarh) nung Ayushman Bharat scheme kübok mezüngbuba Health and Wellness Centre semzükja liasü.