Six-nation hockey tournament Pakistan nung asayatsü

Islamabad, Monupiii 07 (Agencies): Pakistani six-nation international hockey tournament ka Rongjui/September mezüngbuba hopta nung ayongzüka akatsü aser iba asayamung akatsüba atema Rawalpindi ya parnoki shimtetba tesem mezüngbuba lir.
APP den jembidang Pakistan Hockey Federation (PHF) secretary, Shahbaz Ahmad Sr-i ashiba agi, iba asayamung ya Rongjui/September 2 nungi 10 tashi asayatsü aser iba asayamung ya International Hockey Federation (FIH) calendar nung dena inokogo.
“Iba asayamung nung shilem agitsüba team temji; Pakistan, Oman, Afghanistan, Kazakhstan, Turkey aser Sri Lanka alitsü,” ta paisa ashi.
“Onoki iba asayamung ya Rawalpindi, army stadium nung akatsüba atema merangdangdar aser onoki Pakistan army tang temelaba meshitsü,” ta paisa ashi.
Rawalpindi nung iba asayamung makatetra Naseer Bunda Hockey Stadium Islamabad nung akatsü ajisüaka Islamabad indang stadium nung astro turf tasen ka inok nungdang iba asayamung ya idakji asayatsü, ajita mesera Karachi nung asayatsü, ta secretary-i ashi.
Ahmad-i ashiba agi, PHF puri linük nung Hocky asaya asendenshia ajungkettsü asoshi takokba tashi inyakdar.
“World XI team-i taoba küm Pakistan semdangogo aser Lahore o Karachi nung asaya kaka asayaogo, koba asentenshi asoshi jenjang tajung ka liasü. Six-nation hockey tournament ya Pakistan atema tajangzük asütsü imlar,” ta paisa ashi.