Mitkartemi Arunachal Pradesh nung telungpur apu

Dimapur, Monupii 08 (TYO): Telung nung alitem mita bushiba sentong nung DAO division kübok Khonsa Battalion ajanga Tirap district kübok Longbu yimtsüng nung Monupii/May 8, 2018 anepdang telungpur ka apu.
Longbu tesem nung telungpur temi mapa tamajung inyaka tashiyim agi sen sarua senzür ta osang angashia sepaitemi NSCN (IM) nungi Self Styled Rajapio, Kijen Thiaktey Wangsu apu.
Pa ket nungi Khonsa Battalion-i pistol ka aser injang ngutet, ta PRO (Defence), Col C Konwer-i sangdong ka ajanga ashi.
Iba nisungba den asüngdangyaba mapang pa ya NSCN (IM) nungi lir ta pai nangzük. Paisa ashiba agi, pa ya Monupii/May 1999 küm NSCN (K) nung oa Self Styled Private ka ama aden aser Aami/June 2015 nung NSCN (U) dangi meyipa yangji Mongputeni/October 2016 tashi Self Styled Lieutenant ka am alia aru. NSCN (U) nungi pa Luchii/December 2017 nung bilar NSCN (IM) nung Rajapio ka ama inyaka iba tesem nung aliba yimtsüngtem nung tashiyim agi sen sarua aser ozüng alema mapa tamajung inyaka aru, ta paisa nangzük, ta kasa sangdong ajanga ashi.