Red Cross Day nü Nagaland tensa jungdaktsütsü atema inyaktsü ayongzük

Kohima, Monupii (May) 8 (TYO): Tanü Nagaland nunga World Red Cross Day ayongzüka amung aser iba anogo nung Naga lanurtem dang Red Cross nung adentsü aser state nung tensa tajungba kümdaktsütsü atema mapa inyaktsü tayongzükba agütsü.
Tanü Indian Red Cross Society, Nagaland State Branch-i ‘Everywhere for everyone, smile” omen nung ajemdaker iba sentong amungdang Commissioner and Secretary for Health and Family Welfare, Himato Zhimomi-i iba tayongzükba agütsü.
Nagaland nung Red Cross Society aliba atema pelaba ashidang Himato-i iba telok nung taintem teimba lir anungji lanuputu nem mapa benloktsütsüla ta ashi.
Red Cross Society-i medical camps aser blood donations camps ayonga agiba den lendong atalokdang yaritepba dang masü saka tensa mejungi aliba jungdaktsütsü atema mapa inyaktsüla, kechiyong Naga yimten tebilemtsü atema telemtetba magitetba ajanga asen state nung tensa mejungi lir, ta paisa shisem.
IRCS Nagaland State-i tensa tajungba kümdaktsütsü atema mapa inyaktsü imlar aser Red Cross Society nung lanupututem anioka, parnok nem mapa inyakdaktsütsüla, ta Himato-i ayongzük.
Nagaland nung lanurtem dak HIV kanga atonger anungji Red Cross Society-i iba dak sendakba nung tesayuba agütsü nung ajungtsü, ta paisa ashi.
Sentong nung IRCSN vice chairman Dr S Imkong Tushi Ao menden liasü, Chang Baptist Church Kohima Pastor Anungla Chang-i temoatsü meshia sarasadem, Mt Sinai Higher Secondary School aser Bayavü Hill High School kaketshirtemi ken aten aser IRCSN managing committee züngsem John Kath-i anküp tepela o jembi.