Mozü yanglutetba süngoliotem wazüka ayutsü asoshi shisatokden aka

Mokokchung, Monupii 10 (TYO): Mokokchung Forest Division-i ayongzüka asen lima nung anguba mozü yanglutetba süngolio/süngdonglidong (Local Medicinal Plants) wazüka ayutsü nüngdakba ajiteta shisatokden sentong ka Yangtepnü Khar yimdak kaogo, ta Divisional Forest Officer (DFO), Mokokchung, A. Bendang Jamir-i osang ka ajanga metetdaktsü.
Iba sentong nung Division kübok aliba Range balala nungi Forest Officer-temi onük balala nung ajemdaker jembi. Assistant Conservator of Forest (ACF) Longchem – Lima-i “Importance of Medicinal Plants and its Conservation”, ACF Mokokchung – Imkumba-i “Medicinal Plant Conservation & Development Area (MPCDA)” aser Longtho Ranger – Imkongsunep Longchar-i “Medicinal Plants found in Mokokchung district” onük nung jembia liasü.
Iba sentong nung DFO Mokokchung A. Bendang-i shisatokden okilaja jembidang, akhi tsürabur mapang nungi amshia aruba mozü yanglutetba süngoliotem wazüka aser kümzüka ayutsü nüngdakba den ibaji maneni amshitsü asoshi yimdaklirtem ajungshia liasü. Mozü yanglutetba süngolio-tem indang shisa balala bendena/rizünga ayuba maparen nung amalitepdaktsünür, ta paisa shisem.
Onük dak sendakba nung yangji adener yimdaklirtemia parnoki benshia aser ajangshia aruba kar lemsatep. Local practitioner kari tepoki nguha/perepba (stomach disorders) mapang amshiba “Khar moli” ta sür süngo tapu trok meyokteper yangluba mozü ka indanga lemsatepa liasü.
Iba sentong nung Changtongya Ranger Moamongba menden liasü aser Khar Baptist Arogo Pastor L. Kumzuk Walling den temoatsü meshia sarasademer tenzük. Mangkolemba Ranger Odibendangi tepela o jembi.