Bye election atema Tokheho aser C. Apok Jamir nati tenüng agütsü

Monupii/May 10, 2018 nü Commissioner’s Office, Kohima nung NPF nungi C Apok Jamir (abelen) aser NDPP nungi Tokheho (ajichilen) nati Lok Sabha 2018 bye election nung tokteptsü atema tenüng agutsüdang tangokba noksa nung angur. 

Kohima, Monupii/May 10 (TYO): 1-Nagaland Parliamentary Constituency atema Lok Sabha 2018 Bye election nung tokteptsü asoshi Monupii/May 10, 2018 nü Commissioner’s office, Kohima nung Nationalist Democratic Progressive Party (NDPP) nungi Tokheho aser Naga Peoples Front (NPF) nungi C. Apok Jamir nati tenüng agutsüogo.
Commissioner, Nagaland aser Lok Sabha by-election atema RO, Motsuthung Patton, IAS den Additional Deputy Commissioner (Hq) & ARO, Limanenla-i yarisema candidates-i agutsüba documents reprang, aser General Observer, Dr. J. Ravi Shankar, IAS-i Bye election atema Nagaland Parliamentary Constituency nomination file asüba inyakyimji repranga liasü, ta ketdangsertem osang ka ajanga metetdaktsü.
Lok Sabha bye election ya Monupii/May 28, 2018 nü agitsü.
Tenüng agutsütsü atema Monupii 3 nungi Monupii 10, 2018 tashi mapang agutsü, aser tatembangbuba anogo nung candidates anati tenüng agutsüogo.
Commissioner Nagaland aser Returning Officer, M Patton-i, ruling People’s Democratic Alliance-i NDPP nungi candidate aser yimtenren lenir tain, Tokheho Yepthomi indang documents agütsü aser proposer ji Ahovi liasü, ta metetdaktsü.
Tanü Tokheho Yepthomi den State BJP Tir, Visasolie Lhoungu aser NDPP Minister, C M Chang na dena liasü.
Ano opposition Naga People’s Front (NPF) nungi taoba Rajya Sabha MP aser taoba MLA, C Apok Jamir-i tenüng agutsü. Pa atema proposer ji NPF otongdar, Achumbemo Kikon liasü. Tanü C Apok Jamir den NPF Tir, Dr Shurhozelie Liezietsu, MLA tem aser party nung inyakertem dena liasü.
Nomination papers ji asüng reprangdangtsü aser candidate-i tenüng agientsü atema tatembangbuba anogoji Monupii 14, 2018 nü asütsü.
Yashi Chief Minister, Neiphiu Rio-i iba election atema NDPP-PDA-i Monupii 16, 2016 nü Dimapur district nungi nüboyim tenzüktsü, ta sangdong liasü. Ano külen tanü NPF Tir, Dr Liezietsu-i nomination papers reprangba sülen nüboyim tenzüktsü, ta metetdaktsüogo.
Taoba MP, Neiphiu Rio-i taküm state Assembly election nung tokteptsü atema MP menden nungi anenba ajanga Nagaland nung Lok Sabha bye election agitsüsa akum.