Anogoshia ango temo gram ka ka achiba ajanga arthritis ajemdaktsür

United Kingdom, University of Surrey nungi bushisüngdanger ajanga ashiba agi, anogoshia ango temo gram ka ka dang achiba ajanga shirangertem osteoarthritis (teret teloktep ayang ashiba) agi kangshiba ajemdaktsür aser parnok cardiovascular (temang aser temulungjang nung azü jajaba) tajungba kümtsür.
Alima nung alir nübur ajaki ango ya sapua achir aser ango temo nung essential fatty acids peria lir. Iba ya achiba agi teret teloktep ayang ashiba ajemdaktsütsü asoshi teyari tulu agütsür.
“Anema alitsü atema nisunger takum nung teinyaktsü tongtibangji, chiyongtsü tajung achiba aser anogoshia exercise agiba ya lir aser item ya kodanga zübazüba metoktsütsüla,” ta University of Surrey nung professor, Margaret Rayman-i ashi.
“Temang anema alitsüji asenok achi ajemba yimya dak keta lir aser tongtibang kaji asen body system shitak mapa inyaktsü atema, asenoki chiyongtsü balala achiba nungi nutrients peria angutsüla,” ta Margaret-i ashi.
Vitamin K peria aliba chiyungtsü; talisa kale, spinach aser parsley temi osteoarthritis keta alir patient nem teyari agütsür ta bushisüngdangerisa ashi.
Parnoki bushitetba agi, temang touzük tali alirtemi touzük ajemdaktsüba aser obesity aketba patient tem mapang shia exercise agiba ajanga osteoarthritis symptoms agientsür.
Obesity yagi teret teloktep tem ayang ashiba timba kümdaktsübaji dang masü saka iba yagi temang nung ‘low-grade systemic inflammation’ tamajungba kümdaktsür.
Alima ajunga nung Osteoarthritis ya tetsür shilem 18 dak keta lir aser arishi küm 60 dak tema tebur shilem 9.6 dak iba tashidak ya keta lir.
Temang anepalutsü yimya süpaba yagi azü nung ‘cholesterol levels’ ajemdaktsür. Temetettsü kaji ‘high blood cholesterol’ ya osteoarthritis tashidak den sendaktepa lir, ta bushisüngdangertemisa ashi.
Source – Internet