Nurse temi maneni mapa tajung inyaktsüla: MLA Nakhro

Kohima, Monupii (May) 12 (TYO): Nagaland nunga tanü Trained Nurses Association of India, Local Branch Kohima-i International Nurses Day ayonga amung.
DBT Hall, Naga Hospital Authority Kohima nung sentong ayonga agiba nung tetushi süa jaokerji NPF MLA Keneizhakho Nakhro liasü.
Sentong nung jembidang Nakhro-i nurse temi mapa tajung inyakba atema pelaba metetdaktsü aser tayongzükba jenti liaka nursing mapa inyaktsü shimba atema tenüngsang agütsü.
“Doctor tajung ka sülen nurse tajung ka lir. Nenoki bendanga agüja inyakaka aiben loktii nenok nem tenüngsang mesüra akhümtsübu magütsüi aruya aliyasü akok. Ajisüaka, nenoki nüngdakba mapa nung nisungtem yariba ajanga nenok temulung süngzükya alitsü. Iba tangatetba ajanga Florence Nightingale-i ‘The Lady with the lamp’ aküm” ta Nakhro-isa shisem.
Paisa nurse tem maneni meimchir tenzükba mapa inyaktsü ayongzük.
Sentong nung Nursing Tutor, SON NHAK, S. Tiakala Longkumer-i temang anema alitsüba ya meimchir ka indang temeten lir ta asüba omen jembidang, nurse mapa inyakertemi temang dak sendakba maparen tali angajema inyaktsü atema iba onük ya shimba lir, ta ashi.
“Asenok longjemer health care aser health system pusema nungitdi. Health policy yangluba mesüra sentong atongba nung asenok indang ola dendaktsüdi” ta S. Tiakala-i nurse tem ayongzüka jembi.
Sentong nung mendenji TNAI Local Branch, Kohima President, Rita Angami liasü aser la nem ‘Nurse of the Year’ sempet agütsü.
Retired Deputy Director Nursing, Kiyasetuonuo-i milen tsükloktsü, Kedolhounuo & medemertemi ken ka aten aser TNAI Local Branch general secretary Anatoli-i anküp tepela o jembi.