OORJA-CAPFs U-19 Talent Hunt Football Tournament 2018

Dimapur, Monupii 12 (TYO): Nagaland nung tetsür aser teburtem atema OORJA Under 19 Football Talent Hunt Tournament ya Aami/June 09 nungi Aami/June 19, 2018 tashi agitsü. Iba asayamung ya HQ IGAR (North) ajanga Kohima nung ayongzüktsü. Iba asayamung ya football asayaba nung teburchanu aser tetsürchanutem sempet ajitettsü aser ajungshitsü asoshi ayongzüker. Iba asayamung nung Nagaland nungi tetsür team 20 aser tebur team 30-i shilem agitsü.
Iba tournament ya State level asütsü aser State Football Federation nung affiliate süa aliba football club aser CBSE/IPSC mesüra Sate Board nung affiliate süa aliba school tem nungi arua shilem agitsü jaoker. Iba asayamung nung shilem agitsüpru tetsür aser tebur ajak Aenjeti/January 1, 2000 nung mesüra iba sülen asor asütsüla aser asaya nung shilem agitsüpur ajak pei tasoba küm atema kuli tejangja agütsütsüla.
Iba asayamung nung mezüng jenjang tongteter nem senpet sen lakh 2.5, tanabuba jenjang tongteter nem senpet sen lakh 1.5 aser tasembuba jenjang tongteter nem senpet sen lakh 1 agütsütsü. Iba asayamung nung shilem agitsüpur atema chiyongtsü, anisüngzükdak aser oli-oratsü asayamung ayongertemi agütsütsü aser iba den külemi asayar ajak nem football kit agütsütsü.
Iba asayamung mapang state nung tetsür aser tebur telok nungi team ka-ka shimteter New Delhi nung Chiteni/July 16 nungi 25, 2018 anogotem nung asayatsü aliba National level tournament nung shilem agidaktsütsü. Iba asayamung nung shilem agitsü jangra aluba team temi tali tejangjaba nung tongteprateptsü atema HQ 5 Sector AR den 7005837508/ 8837219927 ajanga osang agitepang aser registration atema last date Monupii/May 25, 2018 asütsü.