Kohima nung alir tanur ka Bihar nung angu

Dimapur, Monupii (May) 14 (TYO): Childline Dimapur-i Monupii (May) 11, 2018 nü Dimapur Police dang Khatihar Railway Station, Bihar nung tebur chanu ka den Dimapur nungi agütsüba Avadh Assam Train ticket ka ngua lir ta osang sangoktsü.
Tanurji shibelentsü atema mesüra tanga tasa tamajung kar atema anir ao asütsü akok ta temulung melemi bilema Dimapur Police den Childline Dimapur-i osang metetpelatsü tenzük aser social media- Official Facebook account, WhatsApp nung iba osang prokshi.
Mapang shitak nung osang prokshiba ajanga Monupii (May) 11, 2018 nü Kohima nungi tanubosanger kinungertemi phone asü aser tanur maitsü jangjashitsü. Tang tanubosangji Bihar nungi anir arutsü atema mapa inyakdar aser maneni bushisüngdang südar, ta Addl. Dy. Commissioner of Police/PRO, Dimapur-i sangdong ka nung metetdaktsü.
Public aser media sabang balalai amalitepa mapang shitak nung tanur maitsü jangjateta kümzükba atema Dimapur Police-i nenok ajak dang pelar, ta ADCP/PRO, Dimapur-isa metetdaktsü.