Modi-i amokmerenba Congress-i ashishia Tir dangi shidi zülu

New Delhi, Monupii/May 14 (Agencies): Karnataka assembly election atema nüboyimba sentong nung Ato kilonser, Narendra Modi-i jembiba o kanga ashishia Congress-i linük Tir, Ram Nath Kovind dang shidi ka ajanga, Ato kilonser, Modi dang amokmeren o mejembitsü atema tekümdangtsü shiang, ta mepishiogo.
Monupii/May 13, 2018 nü züluba shidiji tanü osangbenertem dang sangdonga liasü, aser iba shidi ajanga taoba mapang Ato kilonser, Manmohan Singh densema Congress lenirtemi, Karnataka Assembly election atema Hubli nung nüboyimba mapang Congress lenirtem amokmerenba indang shia lir.
Shidi nungji, “Akhümtsübua alisang Tiri Ato kilonser dang item ama nüngdak maliba o aser amokmerenba o Congress lenirtem aser tanga party tem anema mejembitsü tekümdangtsü ashitsüla, kechiyong ibaji Ato kilonser akhümket menden den meputep,” ta shia lir.
Monupii/May 6,2018 nü election nüboyim sentong nung jembidang Modi-i, “Congress lenirtem, nenok tenarong lapoker angaang, nenoki talitabong inyakra, iba ya Modi lir, nenoki meyipa angutsü,” ta jembia liasü.
Congress-i Tir dangi züluba shidi nungjisa, Modi-i jembiba oji amokmeren o lir aser kar mezüngmeshia yimjung raksatsütsü nükjidong nung jembiba o lir, ta shia lir.
“Taoba mapang Ato kilonsertem ajaki nija aser lokti sentongtem nung Ato kilonser menden akhümket yua liasü,” ta Congress-isa ashi.
“Asen linük ama democratic inyakyim nung sorkar tekolak ka ama Ato kilonseri amokmeren o jembiba aser yimjak nung tongti opposition- Indian National Congress lenirtem amokmerenbaji mamangteter,” ta shidi nung shia lir.
Manmohan Singh dak alia iba shidi nung sign asürtem rongnung Ghulam Nabi Azad, Karan Singh, Mallikarjun Kharge, P. Chidambaram, A.K. Antony, Anand Sharma, Ashok Gehlot, Motilal Vora, Ambika Soni, Kamal Nath, Digvijaya Singh, Ahmed Patel aser Mukul Wasnik nunger densema lir.
Congress lenirtemisa, linük temzüng nung tekolak ka ama Ato kilonser aser par Cabinet sayutsüngitsüji Tir teinyaktsü mapa lir, ta ashi.
Modi-i Congress lenirtem amokmerenbaji aitsütsü tetemsü, ta parnokisa ashi.