NRC inyakyim minprongtsü atema bill anema nokdaker: BJP

Guwahati, Monupii (Agencies) 14 (Agencies): Assam BJP puri Amungnü ashiba agi, lokti tentet aser nisung kari NRC update asüba minprongtsü asoshi Citizenship (Amendment) Bill, 2016 dak nüburtem rangloker inyakdaktsütsü asoshi meranger.
Parnokisa par party züngsemtem dang bill dak sendakba nung tashishitsü onük kecha mejimbitsü asoshi tetuyuba agütsüogo.
BJP state tir Ranjeet Kumar Dass-i ashiba agi, tashi kar ajanga state nung yimjung raksaja NRC inyakyim mashileni anir aotsü meranger. Parnoki Bangladesh nungi arua alir Hindu nunger crore 1.9 aliba nungi crore 1.7 shi nem iba bill agizükra lisopur jenjang agütsütsü, ta ashir.
Ajisüaka Das-i nisung tenüng mesera lokti tenüng tuteta mashi.
Krishak Mukti Sangram Samiti puri ashiba agi, BJP puri iba bill ajanga Assam nung alir Bangladesh, Hindu nunger crore 1.9 nem lisopur jenjang agütsütsü asoshi meranger.
“NRC tatembangbuba draft ya Aami (June) 30 nü adoktsüba lir aser ni nüburtem dang iba inyakyim ya minprongtsüsa jenjang kecha magitsü asoshi mepishir,” ta Dass-i ashi.
Paisa nüburtem dang lokti aser nisung kar tejangraba nung asalentong balala yanglua inyakba nem manishidaktsütsü asoshi mepishi aser chief minister Sarbananda Sonowal-i ashiba olen den yarisema, sorkari nüburtem tejangraba anema telemtetba kecha magitsü, ta ashi.
Dass-isa party züngsemtem dang bill dak sendakba nung mepetmesü adoktsüsa olen kecha benoka mejembitsü asoshi tetuyuba agütsüogo, ajida mesera party-i tapet temerenshi agütsütsü.
BJP puri iba bill agizüktsü asoshi pusemaka parnok rongnung Dispur MLA Atul Bora aser BJP state executive züngsem Mira Borthakur nungeri iba bill anema jembiogo.
Iba olen ya Dass-i Amungnü party ketdangpurtem senden akaba sülen ashi. State nung iba bill ajanga tensa mejungi akümba indang sensaksemtsü asoshi parnoki iba senden ya ayongzüka aka.
Health minister Himanta Biswa Sarma, transport minister Chandra Mohan Patowary, BJP national general secretary Ram Madhav aser general secretary (organisation), Northeast Ajay Jamwal nungera iba senden nung aden. Dass-isa Lok Sabha Speaker Sumitra Mahajan dang joint parliamentary committee puri nüburtem tebilemba angadangtsü asoshi Brahmaputra Valley tanaben semdangtsü asoshi mepishi.