Government benjong

Asen oshi nung government melena sorkar ta amshir saka sorkar ta asübajia tangar tsümar oshi asünungji sorkar ta amshiba dang nungibo government ta amshiang tajungba ta tebu tedi tajung kari ashiba agi aiben sorkar ta masü saka government ta amshir. Iba kasa tangatetba nung tanüa iba yimobilem onük nung ya Government benjong ta dang amshidi. Yangi Government benjong ta asübaji Nagaland government-i küm shia December ita tetenzüklen Kohima district kübok Kisama nung Naga nunger kin ajak jaoka amongba Hornbill benjong indang tebilemba kar lemsatepner. Aiben asenok rongnung iba hornbill benjong aliba ajanga tajangzük mesüra takoksa anguba indang jembia aruogo. Atangji, takoksa liaka tajangzüka aika angur asünungji, iba benjong ya tajungba tajungba lia aotsübajiang government sentong nung alitsüla. Iba tangatetba nung taoba mapang iba osangkaket nunga asenoki aiben Hornbill benjong ya Kisama nung dang masü saka district ajak nung ali nunga koma süla (?) ta asüba tasüngdangba nung shisalemsatepa aruogo. Iba taginübaji ataloktsür amato, tang Nagaland government-i taküm küm nungibo Hornbill benjong ya district ajak nung amongtsü ta sangdongogo. Ajisüaka, government tebilembajibo Hornbill benjong ya December mezüng hopta nung Kisama nung amongba den külemi Nagaland ajunga nung amongtsüba masü saka Hornbill benjong temejajibo tang monga aruba ama, Kisama nung amongtsü saka tanga district-tem nungbo pei kin sobaliba benjong den külemi repsema Hornbill benjong amongtsü tangatetba nung iba telemtetba ya agia lir. Tetezü Mokokchung district nung Hornbill benjongji Moatsü den külemi amongtsü, Kohima nung Sekrenyi benjong den külemi, Zunheboto nung Tuluni benjong den, Mon aser Longleng district nung Aoleang aser Monyu benjong den külemi ta amala tanüngba district-tem nunga pei pei kin sobaliba benjong den külemi Hornbill benjong amongtsü. Item benjong amongtsü asoshi government-i senotsü teyaria agütsütsü. Ajisüaka tebilemdangtsü kaji Moatsü, Sekrenyi, Tuluni aser Aoleang Monyu benjongtemji Hornbill benjong mesütettsü. Aji oda, Moatsü nung amongtsü jaokdang Hornbill benjongi arung ta mejaoktettsü. Koba benjong südir süang nükjidong aser tetezü keta lir. Tanü asenoki monga aruba sobaliba benjongtem ya teimbaka aluyimba maparentem dak sendaka lir aser item benjongtemji Tsüngrem dang nungi temoatsü meshiba mesüra tenüngsang agütsüba benjongtem lir. Tetezü Naga nunger sobaliba benjong ajungaji aluyimba aser tamangba yimsü dak metaloka lir. Ajisüaka, tanü putu tasenba nung government-i tentetba Hornbill benjong yabo aluyimba nunga sendaka mali aser Tsüngrem daka metaloka mali. Iba benjong amongba yabo Naga nunger sobaliba kümzüka ayutsü aser item sobalibatem benshibaji reprangi bendangertem asen limai arudaktsütsü aser parnok asen limai arua amongba ajanga parnok dang nungi asenoka senotsü ajangzüktsü nükjidong nung tentetba lir. Iba amaji Hornbill amongba ajanga alima ajungai Naga nunger sobaliba indang tajungba metetogo aser küm shia Hornbill benjong nung adentsü arur bendangertem tiemba teimba kümdagi. Item raliwalirtem anenba, chiyongba, gari nung bener senzüba aser parnoki osettsüset aliba nungi asenok aika senotsü nung kanga ajangzükdagi. Ajisüaka tang tashibo tapayutsükaji, iba benjongji Kisama (Kohima) nung dang, anungji Nagaland reprangri arurtema Kohima reprangerbo Nagaland telongbo mangu meyipa aor aser tajangzüka Kohima nung alirtem dang mesüra Kohima tongtettertem dang agir. Ano, reprangtetba kaji, Hornbill benjong nung amongtsü arur raliwalirtem Kohima nung anogo ka ana mongerbo tereprangtsü aser taolen maka lakadoker. Ibayongji, raliwalirtema Nagaland ajunga ngur aotsü aser Hornbill ajanga bentsür aruba temoatsüa Naga nung ajak agishitsüsa Hornbill benjong ya Kisama nung December mezüng hopta nung amongba den külemi Nagaland ajunga nung amongang tajungba aser shitakba asütsü. Moatsümongji Moatsümong  südakjang aser Hornbill benjongjia balaka südakjang. Koba benjong südir süang kasa benjong saka anogo balala nung amongtsübaji shitak masütsü.