Tripura CM atsü tekaraba nung yanglutsü tuyu

Agartala, Monupii (May) 16 (Agencies): Tripura Chief Minister Biplab Kumar Deb-i India-Bangladesh arrtsü nung atsü yangluba tekaratiba nung tembangtsü atema tetuyuba agütsüogo, ta ketdangsertemi ashi.
Deb den ketdangsertemi Mongulbarnü Sonamura nung atsü yangluba tesem semdang aser iba sülen Border Security Force (BSF), Tripura Police o district administration den külem senden ka amen.
“Senden nung Chief Minister-i ketdangsertem aser atsü yangluba company tem dang India-Bangladesh arrtsü nung mapa tekaratiba nung tembangtsü atema tetuyuba agütsü” ta Sepahijala district administration nung ketdangser kati ashi.
Deb-i home portfolio bena lir aser pai arrtsü nung atsü yangluba mapa nung tetsükdaktsü agütsüba ka danga magizüktsü ta ashi.
Ketdangsertemi Chief Minister dang ali dak sendakba maparen tembangogo aser arrtsü tesem kar nung atsüji single-line aser kar nung double-line yanglutsü ta ashi.
Iba mapang Chief Secretary Sanjeev Ranjan, Director General of Police Akhil Kumar Shukla aser Inspector General of BSF Hemant Kumar Lohia nungertemi Beb meiner senzü.
“Tripura-i Bangladesh den arrtsüa aliba tesemtem kübok Sepahijala aser Dhalai district tem nung tesem kar matsüdang lir. Bangladesh den international border kilometre 856 aliba nung sorkari noklang nung shilem 90 tashi atsüdangogo” ta home department ketdangser kati ashi.