Tarun Gogoi-i Sarbananda Sonowal aitsür

Guwahati, Monupii (May) 16 (Agencies): Centre-i Citizenship Act of 1955 yanglushitsü merangba anema Assam nung nübortemi lungkak aitba mapang ka nung Assam chief minister Sarbananda Sonowal-i Vietnam semdangba atema Tarun Gogoi-i aitsü.
“Citizenship (amendment) Bill of 2016 anema state ajunga nung lungkak aitdang, pai (Sonowal)-i Vietnam semdangi ao aser ibajia chartered flight ka ajanga ao. Iba ajanga chief minister-i tebilemtsü mabenba sayur” ta taoba chief minister Gogoi-i ashi.
Hombarnü Sonowal-i Vietnam semdang aser sorkar ketdangser aika den ajurutepa tsünüsenbongba, shishilembaba aser rongsenkettsüng dak sendakba onük aika lemsatep.
Mongulbar nikongdang Sonowal meyipa arur saka iba mapang state sorkar mapa inyakertemi Citizenship (amendment) Bill of 2016 meyipa magira parnoki mapa toktsütsü ta pa nem takhangba agütsü.
Taoba hopta joint parliamentary committee-i iba bill dak sendakba tebilembatem metettsü atema Assam-i aru aser idang nung jagi nübortemi lungkak aittsü tenzüka liasü.
“Vietnam-i India nungi agricultural technology bener oa amshir. Sonowal-i agriculture minister aser BJP MLA aika anir Vietnam semdangba nung sen meindoki, Punjab ang semdanga angazüktsüba liasü” ta Tarun Gogoi-i ashi.
“Iba sorkari parnok minister aika bendang linüktemi tangar atsür arutsü atema yokogo saka asangsang nung kechisa atalokar shingaia memetet” ta paisa ashi.
Sonowal-i Vietnam deputy minister of agriculture & rural development, Vietnam external relations commission chairman Hoang Binh Quan aser tangartem den ajurutep.
Paisa Vietnam Academy of Agricultural Science semdang aser idakji ketdangsertemi Vietnam agriculture, agricultural extension programme aser research indang presentation ka sayu.
Hung Yen Provincial Peoples’s Committee-i Assam nung agricultural sector renloktsü atema yariteptsü mulunga lir ta shiogo ta state sorkar atema otongdar kati metetdaktsü.