Yeddyurappa, BJP House lenir shim; sorkar akumtsü asüngdanger

Bengaluru, Monupii/May 16 (Agencies): Tanü tang tasen shimba Karnataka BJP MLA temi legislative party lenir atema taoba mapang state Chief Minister, B.S. Yeddyurappa shimba sülen Assembly nung majority atema menden 8 agi mabensaaka pai sorkar akumtsü atema asüngdangogo.
Tanü Raj Bhavan nung Angh, Vajubhai R. Vala ajuruba sülen osangbenertem den jembidang Yeddyuruppa-i, “Tang tasen shimba MLA 104 densema single largest party ka ama onoki sorkar akumtsü atema asüngdangogo,” ta metetdaktsü.
Tanep Bharatiya Janata Party MLA temi taoba Chief Minister aser BJP nungi Chief Minister candidate, Yeddyurappa legislative party lenir shima liasü.
Paisa, “Ni Angh dang tekaraba nung ni Chief Minister tenangzükba agitsü atema temelaba agüjang ta mepishiogo aser Angh-i, pai tekaraba nung tim telemtetba agitsü ta shiogo,” ta metetdaktsü.
Monupii/May 12, 2018 nü constituency 222 atema election agi aser item menden nungi BJP-i menden 104, Congress-i menden 78 aser JD-S-i menden 38 nung takok ngua liasü.
Simple majority atema menden 112 asütsüla, aser iba atemaji BJP-i menden 8 tali nüngdaker.
Tanü Rajajinagar nungi BJP MLA, S. Suresh Kumar-i, Congress-i Janata Dal-Secular (JD-S) yaritsü asüngdangbaji taaktsüka lir, kechiyong party Tir, Rahul Gandhi densema Congress lenirtemi JD-S ji BJP indang team-B lir ta aija liasü, ta metetdaktsü.
Yashi election osang sangdongba sülen Congress-i state nung sorkar akumtsü atema JD-S yaritsü asüngdanga liasü.