BJP Nagaland Organising Secy., Ananta Mishra-i LK Advani ajuru

Kohima, Monupii/May 16 (TYO): Monupii/May 15, 2018 nü Nagaland Bharatiya Janata Party (BJP) Organising Secretary, Ananta Mishra-i New Delhi nung BJP lenir tain, L.K Advani ajuruogo, ta tanü Media Cell, BJP Nagaland-i sangdong ka nung metetdaktsü.
Lal Khrishna Advani (November 8, 1927 nü aso) ya 1980 küm mezüngbuba BJP All India General Secretary liasü aser BJP Tir asemben tashi inyakogo. Atal Bihari Vajpayee sorkar mapang Advani-i India nung 7buba Deputy Prime Minister 2002 nungi 2004 küm tashi inyak; Pa ya BJP co-founder aser senior lenir rongnung ka lir.
“Minute 35 shi senden amenba mapang nung North East aser Nagaland State dak sendakba tongtibang onük aika nung o lemtepa liasü. Nagaland State dak sendakba nung Advani-i tesüiba mapang BJP State Tirtem 1993 nungi 2009 küm tashi, NC Zeliang aser Dr N.Rhetso nunger bilemteta parnoki timtem aika ajurua state nung party dak sendakba mapatem inyakba lemsatep. Mapang tamajungdang aser party kanga anemba mapang ka nung parnoki kanga meranga inyakogo ta pai ashi,” ta sangdong nung shia lir.
LK Advani-isa taoba mapang North East Organising Secretaries- PB Acharya aser P. Chandrashekara Rao nati party aintsü atema region nung anibelem kanga arema inyakba bilemteta lemsatepa liasü.
Tanübo BJP Nagaland nungi BJP MLA 12 tashi Chief Minister, Neiphiu Rio-i aniba PDA (Peoples Democratic Alliance) sorkar nung dena lir aser Centre nung NDA nunga züngsem lir. Tawa tembangba 13buba State Legislative Assembly Election nung takok angur BJP MLA tem aser party nung inyakertem den salem lemsatepba den külemi tenüngsang agütsüdang Advani-i Y.Patton Nagaland Deputy Chief Minister akumba atema tenüngsang agutsü.
Paisa state nung terenlok tsütsü temelenshi lir asü? ta metetpelaba den külemi party dang nüburtem tajungtiba nung tenzüktsü ajungshia liasü.
Kasa senden nung Monupii/May 11, 2018 nü Nagaland nungi party nung lenir tain, K. Medom Angami asüba indanga süoka jembidang Advani-i party den tejashi lemsatepba den külemi mangyimer kibong dena mangyim lemsatep, ta kasa sangdong ajanga metetdaktsü.