Kohima nung Nagaland Skills Competition tenzükogo

Monupii/May 16, 2018 nü Kohima nung State Skill competitions tenzükba sentong nung Director, Y. Vandanshan Lotha-i jembiba noksa nung angur.

Kohima, Monupii/May 16 (TYO): Tang Nagaland nung mezüngsüa tanü Kohima nung “Make Nagaland proud with your skills” omen nung ajemdaker anogo pezünü State Skills competitions Nagaland 2018 tenzükogo; iba tetoktepba sentong ya Directorate of Employment, Skill Development & Entrepreneurship-i ayongzük aser event partner ji Synergy Group Enterprise lir.
Iba tetoktepba sentong ya Ministry of Skill Development & Entrepreneurship for India Skills-i lateta alibatem nung ajemdaker agitsü.
Iba sentong tetenzük nung jembidang Director, Y. Vandanshan Lotha-i, ‘skill’ ya tasodang nungi aketba sempet kija masü, saka tejangraba, yimya sübaa angazükba aser nendaka inyakba ajanga ajangzüker, ta metetdaktsü.
Alima ya kanga tetoktepba aliba lima ka kümogo, aser nisung ka dang nungi tajungtiba imlar, ta shia Vandanshan Lotha-i, mongin akumtsü aser azükarutsü atema nisung ka dak skill tajungtiba alitsü nüngdaka kümogo, ta ashi.
Pei dak aketba sempet sayutsü aser ano tajungba akumtsü atema iba ya maongka tajung ka lir aser sabang tajung ka lir, ta shia pai lanurtem dang iba maongka tajungtiba nung agia angazüktsü ayongzüka liasü.
Iba tetoktepba sentong tongmelang agi metetdaktsüdang Joint Secretary, Anthony Ngully-i, iba sentong ayongzükba tongtibangtiba nükjidongji lanurtemi pei sempet sayatsü atema sabang agutsütsü aser tetoktepba sentong ajanga lanurtem ajungmesotsü asoshi lir, ta metetdaktsü.
Paisa, iba sentong ya world skill competition tashi nung tokteptsü atema inyakyim shidak ajanga lanurtem sempet arangshitsütsü atema lir; iba ya level balala- districts, state, region aser national level iba süalen alima level tashi nung agitsü, ta metetdaktsü.
Ngully-isa, state level nung shimtetbapurtemi regional level nung shilem agitsü aser 2019 küm national level nung shilem agitsü, iba sentong ya küm ana shia khen agitsü aser takok angurtemi India tenüng nung Russia linük nung World Skill competition nung shilem agitsü, ta metetdaktsü.
Iba tetoktepba nung skill trades 52 densema lir, ajisüaka mapang agi memelaba ajanga tetoktepbaji trades ana- cooking aser patisserie/confectionary nung dang agitsü aser arishi küm 21 tekübok lanurtemi shilem agitsü, ta paisa shisem.
Ajisüaka tarutsü nungbo department-i sempet aketer lanur timbai shilem agitettsü atema lungro mapa, electronics, painting, decorating, hairdressing, beauty therapy, fashion technology aser graphic designing ama skill trades nunga tetoktepba ayongzüktsü, ta paisa shisem.
Cooking, patisserie/confectionery atema screening ji Monupii/May 16-17 anogotem nung agitsü aser tongti tetoktepbaji Monupii 19, 2018 nü agitsü.
Iba tetoktepba nung tetendangertemji Aien Jamir, Alemjungla Jamir, Chenti Phom, Joel Basumatari aser Rovi Chasie nunger asütsü.