Governor Vala-i BJP nem maongka agütsür; BS Yeddyurappa-i tanü tezüngzüktep agitsü

New Delhi, Monupii (May) 16 (Agencies): Karnataka nung shiri sorkar akümtsü ta kanga dang terata ka nung aruba sülen taonung Karnataka Governor Vijubhai Vala-i BJP chief ministerial candidate BS Yeddyurappa taruba sorkar akümtsü atema jaokogo.
Governor Vala-i Yeddyurappa dangi shidi ka nung taruba Chief Minister inyaktsü atema tezüngzüktep agitsü jaok.
BJP lennirtem Basavaraj Bommai aser Murlidhar Rao nati Governor-i züluba shidiji jangjatsüogo aser Brihostibar anepdang 9:00 ako nung Yeddyurappa-i tenangzükba agitsü ta metetdaktsü.
“Asüng BS Yeddyurappa kisüng tezüngzüktep agitsü. Nübo teimba sayuba sülen cabinet shimtsü” ta Rao-i osangbener dang ashi.
Governor-i BJP nem anogo 15 nung nübo teimba sayutsü atema mapang latettsüogo. Governor-i taoba Attorney General Mukul Rohtagi den asüngdangya asüba sülen iba telemtetba agi.
Tanü nikongdang JDS aser Congress-i Raj Bhavan nung Governor Vala den ajurutepa sorkar akümtsü atema asüngdang saka idangji Vala-i legal expert tem dang asüngdangyatsü aser Goa o Manipur nung inyakbatem meyipa reprangdangtsü ta ashi.
JDS-Congress teloktem nung MLA 117 lir aser ibaji sorkar akümtsü menden dang nungi teimba lir.
Sorkar akümtsü atema maongka mezüng magütsüra Supreme Court nung ken o ka benoktsü ta Congress-i metetdaktsüogo.