NNC Ao Region-i ayongzüka plebiscite agiba bilemteta amung

Mokokchung, Monupii 16 (TYO): Naga National Council (NNC) Ao Region-i ayongzüka Naga nunger yimden rongsen meyongnem (Plebiscite) agiba bilemtetba sentong ka yangi NNC Peace Camp, Yimyu Ward Mokokchung nung liogo.
Tanü iba sentong nung NNC Nagaland vice president T.Senka Ao-i “Naga yimden tamentakdak” onük nung ajemdaker jembidang, otsüla-oboula nunger mapang nungi Naga nungerji temeja kin ka ta sür lia aru aser shinga küboka maliasü, ta metetdaktsü.
Naga nungerji India nunger kübok malitsü ta sür NNC-i achayanga 16th May, 1951 nung iba ‘plebiscite’ ya agi aser tanü joko iba ya agir küm 67 ajunger aser iba ya international jenjang nung lir, anungji, iba ya Naga yimden asoshi tamentakdakji lir, ta pai ashi.
Tanü telok balala liaka, ‘NNC ya tetenzük aser NNC ajanga dang iba keno ya tembangtettsü (alpha & omega) aser Naga nunger asoshi teimlaji NNC dang lir’, ta ashi. ‘India nungeri NNC dang tsübur kechiyong NNC ket nung tongtibang yimden kaket (documents) ajak yua kar’, ta paisa shisem.
‘16 Point Agreement’ ya tatembang masü ta ashidang, iba ya telok kati bener aruba dang lir, anungji, ibai Naga nunger ajaki mulungba masü, ta paisa jangjashitsü.
Plebiscite agiba anogo bilemteta amungba den ano Ao Region NNC-i adokba ‘Atrocities: Struggles and sacrifices of the Aos in the Freedom Movement of the Nagas’ ta sür kaket ka Khensa Baptist Arogo Pastor, Rev. K. Temjen (L)-i sarasadema sayatsü.
Iba ‘Atrocities’ kaket nungji Naga yimden dak sendakba onük balala den tongtibangsa Ao lima yimtsüngtem nung India sorkari nüburtem rishikangshiba, rongsen mitsü kümtsüba aser nisung taküm samatsübatem zülua angutsü.
Temenungratsü iba sentong nung yimdak yimtsüng balala nungi taoba mapang NNC tenzükertem aser tang teinyakdak purtem aden. Sentong nung Ongpangkong Mungdang, Langpangkong Tzükong Mungdang aser Jangpetkong Tzükong Mungdang nungi meyongertem arua parnokia olong o tsütsü jembia liasü.
Sentong nung Ao Region Meden Peyu L. Meren menden liasü. M. AKok (Akhoya) ajanga tayongzükba o tulu bener arua tesentepertem ayongzük aser Sentong Luden tayonger Tsüpong Longchar-i melepzüng o jembi. Yimyu Baptist Arogo Pastor Puryapang den temoatsü meshia sarasademer sentong tenzüka liasü.