Tripura: IPFT pur lenirtem tongtibang senden ka amen

Agartala, Monupii (May) 17 (Agencies): IPFT puri yashi Agartala kübok Nazrul Kalakshetra nung par telok nungi tongtibang lenirtem ajak densema kanga dang tongtibang senden ka menogo. State ministerial cabinet nung IPFT nungi züngsem ana; N.C. Debbarma aser Mevar Kumar Jamatia nata iba senden nung dena liasü. Iba senden nung parnoki tawa BJP aser IPFT na tsüngda mangatettep adokba indang sensaksema liasü.
Senden tembanger osangbenertem den sensaksemba mapang nung IPFT tir N.C. Debbarma-i ashiba agi, “Onoki block balala nung BAC mendenpur shimba maparen khen atema anena alitsü asoshi mepishitsü. Onokisa sorkar dang BJP aser IPFT na tashi amshiyim lirobedema aotsü asoshi asüngdangtsü.”
BJP aser IPFT pur mangatettep adokba dak sendakba nung tir-i ashiba agi, “Auh iba amala mangatettep adokba ya shidak lir. Home department ya CM-i bena lir asünung pai iba ken o onok den sensaksemogo. Paisa onok lenirtem dang iba ken o asadangtsü asoshi shiogo. Chief Minister-i yashi ni aja aser IPFT puri national highway mokdanga aliba agintsü asoshi lenirtem den oa jembitsü ashi. Iba amaji onoki onok lenirtem dang lenmang mokdanga aliba agintsü asoshi tetuyuba agütsü aser parnoki aginogo. Maneni onoki lenirtem dang tarutsü nung iba amala tatalokba paitoktsü asoshi shiogo. Ajisüaka Chief Minister-i IPFT pur den tesendaktep raksatsüba indangbo kecha mejembi,” ta tir-isa ashi.