DDMA-i anentsüh nungi kümzüktsü mapa inyaker

Mokokchung District Disaster Management Authority (DDMA) ketdangsertemi National Highway-2 lenmang Tzüsabang mepu nung anentsüh tulu alua aliba tesem semdanga iba anentsühji tamajungba küma moudaktsütsü atema tenokdangba maparen kar inyakba mapang tangokba noksa nung angur.

Mokokchung, Sept 3 (TYO): Tang ya meyi mapang asünung tzünglu tanen makai aruba ajanga Mokokchung town aser temeket nunga anentsüh kanga bulua aluba osang balala angazüker.
Brihostibarnü Mokokchung District Disaster Management Authority (DDMA) nung mendenbuba Mokokchung D.C Sushil Kumar IAS-i anir ketdangsertemi Mokokchung town aser temeket nung anentsüh lendong tulu atalokba tesem kar semdanga liasü.
Parnokisa tang National Highway-2 lenmang (Tzüsabang mepu Mokokchung yim) aser Artang Ward nung Straightway School tapak nung anentsüh tulu alua aliba tesem semdanga liasü, aser iba anentsühji tamajungba küma moudaktsütsü atema tenokdangba maparen kar inyakogo ta District Project Officer (NSDMA) T Wangshi Jamiri metetdaktsü.
Tang ya tzünglu tanen makai aruba mapang asünung, lendong balala nungi kümzüktsü asoshi nüburtemi tzü sadema odaktsütsü pei alidak kilentzü junga ayutsü mepishir ta Mokokchung Addl. D.C Rajesh IAS-i iba osangbener den jembiba mapang pai inyakdaktsünüba olen ka metetdaktsü.
Ano DDMA ketdangsertemisa Mokokchung Town aser temeket nung anentsüh lendong agi timtema aliba tesemtem kar semdanga liasü ta osang angazüker.