Changtongya nung aluyimer-scientist sensaksem sentong agi

Mokokchung district kübok Changtongya yimtsüng nung ATMA Mokokchung aser NSLRM ajanga aluyimer aser scientist tem sensaksem sentong ka Monupii/May 16, 2018 nü ayongzükba sentong nung adener shisalen sayur aser SHG züngsem (aluyimer) külemi tangokba noksa nung angur.

Dimapur, Monupii 17 (TYO): Monupii/May 16, 2018 anogo Mokokchung district kübok Changtongya yimtsüng nung aluyimer aser scientist tem sensaksemba sentong ka takok ngua agiogo. Iba sentong nung SHG züngsem (aluyimer) 50 dak tali dena liasü.
Iba sentong nung shisalen sayur ya KVK Yisemyong nungi Dr Renbemo, SMS Yisemyong nungi Samuel aser Veterinary Department nungi Dr Aoyimsen nungertem liasü.
Iba sentong ya Nagaland State Rural Livelihood Mission (NSLRM) nung shilem ka ama ATMA Mokokchung ajanga ayongzüka agi.
Iba sentong nung shilem agiba aluyimertem nem ak metsüba mesüra tsünüsembongtsü anepaluba aser süngjanglijang anepaluyim indang tesayuba agüja liasü.
Changtongya yimtsüng nung iba ama sentong ayongzüka agiba rongnung iba sentong ya mezüngpur lir. Aluyimertemi aonsotsü aser süngjanglijang tajungtiba nung adokdaktsütsü asoshi shisalen balala sayutsü nükjidong nung iba sentong ya ayongzük, ta Takalemba Jamir, DFS (NSLRM), RD Changtongya Block ajanga sangdong ka nung ashi.
Changtongya yim lushi ya Mokokchung district kübok ali temu tajungtiba aliba tesem rongnung ka lir aser iba tesem nung somomo, juru amala cash crop tem züsentettsü temsüa lir aser iba den külemi ak aser shiruru balala metsütsü temsüa lir.
Iba sentong nung adenertemi department (ATMA aser NSLRM) dang iba ama sentong ayongzükba aoshi pelaba lemsatep aser iba sentong ajanga aluyimba nung amshitsü shisatsü aika angazükogo, ta shisem.