Zverev-i tasembuba round tongogo

Rome, Monupii 17 (Agencies): Madrid Open nung takok anguba sülen tang Rasemnü (Wednesday) Italian Open asayamung tebur kija tennis asaya nung Germany nunger Alexander Zverev-i Italy nunger Matteo Berrettini madak straight-sets agi takok ngua Masters asaymung atonga akoktsü merangdar.
Iba asaya nung seed tanabuba nung alisang Zverev-i Berrettini madak 7-5, 6-2 agi koka liasü. Ibaji ajanga Zverev-i taoba mapang kasa asayamung nung takok angur Spain nunger Rafael Nadal aser Serbia nunger Novak Djokovic nuger den külemi Foro Italico court nung round tasembuba asayatsü atema jenjang ngutetta lir.
“Madrid Open nung takok ngur külen tang iba asayamung nung asayar tajung tem den tokteptsüji temela masü. Ni asaya nung shilem agitsü atema renemshitsü anogo ka dang ngua liasü saka ni junga asayaogo,” ta Zverev-i ashi.
Munich aser Madrid asayamung nung atonga title koktetter külen tang Zverev-i asaya ter buba atonga kokogo.
Hamburg nungi arishi küm 21 tain Zverev-i Britain nunger Kyle Edmund den round tasembuba asayatsü jangjaogo. Kasa asayamung tebur kija round tanabuba asaya tanga ka nung Kyle Edmund-i France nunger Lucas Pouille 6-2, 7-6 (7/3) agi koka liasü.
Kasa mapang asaya tanga ka nung ‘clay court’ nung asayar mongin Spain nunger Rafael Nadal-i Bosnia nunger Damir Dzumhur 6-1, 6-0 agi koka tasembuba round tongogo.
“Madrid Open nung tamakok anguba sülen, iba asayamung nung temulung aser tashi agüja asayatsüji kü atema tongtibang lir,” ta 2013 küm mezüngbuba Rome title koker tan agi iba asayamung 8 buba akoktsü atema merang asayasang Nadal-i ashi.