Meghalaya aser Manipur nunga single largest party jaoktsüla

New Delhi, Monupii/May 17 (Agencies): Karnataka Angh, Vajubhai Vala-i state sorkar akumtsü atema single-largest party, BJP jaokba sülen opposition party temi state pezü- Goa, Bihar, Meghalaya aser Manipur nunga sorkar tasen akumtsü atema single largest party (opposition) jaoktsüla, ta ola adok tenzükogo.
2017 küm Metsüremi (March) ita nung Manipur assembly elections nung Congress-i menden 60 nungi menden 28 tashi nung takok ngua single largest party liasü, ajisüaka BJP-i (menden 21) National People’s Party (menden 4), Naga People’s Front (menden 4) aser Lok Janshakti Party (menden ka) lokteper sorkar aküm.
Ano külen taküm Tsüklai (February) ita nunga Meghalaya assembly election nung Congress-i menden 21 nguteta single largest party liasü, ajisüaka sorkar akumtsü atema Angh-i Conrad Sangma-i aniba National People’s Party (NPP) ang jaoka liasü.