Hillstar movie theatre tanü nungi lapoktsü

Dimapur nung renemteter aliba Hillstar movie threatre tema aser telung noksa ka yangi angur.

Dimapur, September 03 (TYO): Mapang talang ka nungi Nagaland nung movie theatre kadanga mali aruba sülen tanü nungi tenzüka Hillstar theatre lapoktsü. 1970 meta mesüra iba jakdang asortemi movie theatre nung mezüng movie reprangba bilemteta alitsü. Iba tajangshiba ya putu ka shi samar liasü. Ajisaüka Hillstar tanaben lapokba ajanga tajangshiba tajung meyiba bener arütsü imlar, ta Hillstar Management sangdong ka ajanga metetdaktsü.
Kibong aser tembartem den külemi theatre nung movie reprangba ajanga tepla tali tuluba angur. Asen anibelemba khen asoshi amatoker aser temang anisüngzükdaktsür.
Sangdong ajangsa ashiba agi, Mapang talangka bendanglen nungi tembartem Nagaland-i arüba mapang parnok anir südoksündak tesem maliba ajanga kanga akseta liogo.
Hillstar theatre yanglushitsü tenzükba mapang nungi onoki nüburtem jangratemdaktsütsü aser talangka samar aliba tajangshiba tanaben meyiba bener arütsü nükla yur inyaka liasü, ta parnokisa ashi.
Tesüiba mapang Dimapur nung Latika, Eros, Friends aser La Paloma cinema hall tem liasü. Latika Cinema Hall bo 1970s tetenzüklen lapok iba sülen Eros, Friends, Hillstar aser La Paloma hall tem lapoka liasü.
Movie ajanga asenok jebdaktsür, menüdaktsür aser khen khenbo asen meketa aliba alima angateta kümdangtsür.
Küm ishika Dimpapur nung nungtugu osettsüsettem, shopping complex aser hi-tech photo studios tem lapoka benokba ajangshia arur ajisüaka movie theatre tasenbo ka danga melapok. Anungji onoki Hillstar tanaben lapoktsü telemtetba agi aser tang ibaji asangsang nung atalokogo, Tanü nungibo Nagalang nung film tasen sayali iba nüjisa reprangtsü maongka angutsü, ta management ajanga sangdong.
Parnoki, “Hillstar nung movie jangratema reprangtsü asoshi Silver 3D Wide Screen aser Barco Digital 3D Projector enoka lir. Ola junga angashitsü atema Dolby Digital Surround System enoka lir. Memonui ano sound system tasen kar amenoktsü tebilemba lir. Telung nung 7.5 ton AC trok enokja aliba ajanga movie reprangertem kanga anisüngzüka mener reprangtettsü. Metsümeshidak tesema kanga junga yanglushiogo, aser CCTV camera tem enoka lir. Chiyungtsü ayokdak tesem nung popcorn dang masü saka chiyungtsü tapu balala alitettsü,” ta ashi.
Hillstar nung nisung 439 mendentsü. Amenba telemsa yamai alitsü; Silver – 133 seats, Gold – 210 seats and Platinum – 84 seats.
Parnokisa ashiba agi, Mapang tatsüka lir külenbo ‘discounts & offers’ -a agütsütsü aser melamela ticket alitsü asoshi memonui online ajanga ticket alitsü asoshi lenmang lapoktsütsü.
Ozüng ka ama Hall telungi mokok aser metsüktsü/lighter den tanga chiyutsü kecha bener maitdaktsütsü anungji ajaki tangatetba tajung nung ibaji angatsü mepishir, ta management ajanga sangdongogo.
Asür Lhomithi Sema-i 1988 küm Hillstar mezüng tenzüka liasü aser onoki pai ama nüburtem nem tajangshiba tajung agütsütsü tebilemba lir, ta Hillstar Management -i ashi.