Tashiyim maparen inyaktsü aliba nokdang : France

Paris, Monupii 18 (Agencies) : Tashiyim maparen inyaktsü asameyanga liasü südi ta temulung malem bilemba maparen ka France police-temi nokdangtetogo aser Egypt nunger adianu ana pua lir, ta Rogonü France Interior Minister, Gerard Collomb-i metetdaktsüogo.
“Egypt nunger asangur anati tapokba oset mesüra mim tesashi keta aliba ‘ricin’ amshia tashiyim maparen inyaktsü renemshia liasü,” ta BFMTV ajanga jembidang kilonseri metetdaktsü.
“Ricin amshia mim yangluba indang tesayuba agütsüba parnok ket nungi ngutetogo,” ta Collomb-isa ashi aser tenadi ‘Telecom encrypted messaging app’ ajanga tongtepratepa liasü, ta paisa olen ka shisem.
Taoba Küptoknü Paris yimti nung kotari agi arishi küm 29 tain tebur ka tsüngsetba den tangar pongu yirutsüba sülen tang ibaji jangjaogo.
Tenaji kodang apuar Collomb-i mashi saka osang ka ajanga angazükba agi, tenaji Paris yimti kübok northern 18th Arrondissement nung Monupii/May 11 nüto apu; ibaji Khamzat Azimov-i kotari agi amakba anogo ka jakdang liasü.
Tena rongnungji katibo tashiyim maparen inyaktsü tebilemba liasü, ta angazüker.