High School ka nung prangbong agi nisung ti kaset

Santa Fe, Monupii 18 (Agencies) : Tanü Rogonü Santa Fe, Texas kübok high school ka nung nisung aika kasetogo, ta ozüng amshirtemi osang ka metetdaktsüogo.
Taoba Tsüklai/February ita Florida high school nung linük ajunga aoksadakja nisung aika tepsetba sülen tang tesüsaba prangbong amshia tashiyim maparen inyaker asütsü.
Ozüng amshirtemi ashiba agi, Houston yimti nungi anüolentip tsütsü kilometer 48 shi pilar aliba school nung tashiyim maparen inyakba sülen prangbong amshia amak ta temulung malem bilemba nisungbaji pua lir.
Iba tashiyim maparen nung tajemba agi nisung ti (8) bo kasetogo, ta ‘local media’ ajanga metetdaktsü.
Iba tesem anasa aliba Harris County nungi sheriff office ajanga ashiba agi, nisung aika kasetba atema bushisüngdangba nung par deputy-temia yaria shilem agidagi.
“Joko injang yokba anenogo aser yirur alirtemji anepaludagi,” ta sheriff department-i Twitter ajanga sangdongogo.
Harris County Sheriff, Ed Gonzalez-ia Twitter ajanga ashiba agi, nisung kabo tepuokdak yua lir aser ano tangar ka pua aruogo.
“Yirur aliba police officer ka tang anepaludagi saka paji koma mejungi yirua aliar ibajibo junga mejangjateter,” ta Gonzalez-isa metetdaktsü.
“Mezüng osang angazükba nung ashiba agi, nisung aika taküm samaogo südi. Tsüngremi nüburtem kümzükangma!” ta US Tir, Donald Trump-ia Twitter nung züluja lir.