Gina Haspel mezüngbuba tetsür CIA director inyaktsü shimteter

Washington, Monupii 18 (Agencies) : Democrats nungi par trok Republicans tsütsüi meyipba sülen itdangiter tetsüti, Gina Haspel tetsürtem rongnungi mezüngbuba CIA nung director inyaktsü shimtetogo.
Telok ana tsütsü vote agütsütepba nung 54-45 liasü anungji ibaji agizüktsü junger ta Senate nungi telemaba angutsü nüngdaka liasü aser tesüsa Senate-ia la agitsü junger ta shiogo; CIA nominee ka atema küm neter shi sülen tan ya mezüngbuba Senate nungi temelaba nüngdaka liasü.
1973 küm William Colby shimtettsü atema inyakba sülenbo ‘Undercover position’ balala nung küm 33 shi CIA tenzüka arula Haspel ya mezüngbuba ‘confirmation’ agir asütsü.
Arishi küm 61 tain Haspel ya Kentucky nungi lir saka Air Force serviceman atema jala ka ama alima ajungalen tenzüka dang tain aküm.
Africa, Europe aser alima ajungalen lai inyaka aruogo aser taoba küm CIA deputy director inyaktsü atema mapa nungloktsü.
Tir, Donald Trump-i secretary of state mapa inyaktsü meshimtet tashi CIA director inyaksang Mike Pompeo küboka la inyaka aruogo.
Osang ajangasa ashiba agi, CIA nung inyaker tulurtemi anir aika den ano taoba CIA director asem aser taoba national intelligence director asem densema ‘senior intelligence official-temi’ Haspel nungit.
‘Front-line’ aser ‘executive intelligence expertise’ naprong atema Haspel tetemsü ta shia, “Onoki Director Haspel nem tenüngsang agütsür; kechisarena mapa tasen lapokyonga anir aola-i tang nungi mezüngbuba tetsür ka ama CIA anir aotsü,” ta National Intelligence Director, Dan Coats-i metetdaktsü.
Aji oda süaka, la anema nokdakertem karibo lai junga meinyakba aser CIA nem tenüng tamajung bener arutsüba indang shia la temaba jenjangi ajungketbaji tim masü ta metetdaktsü.