Khuret abenba lenirtemi khuret angateta inyaktsüla: Zhaleo Rio

Medziphema, Monupii/May 18 (TYO): Taruba Lok Sabha MP election atema renemshitsü asoshi joko hopta ka shi dang lia tanü NDPP 5 Ghaspani-II A/C ketdangpurtem, Core Committee züngsemtem aser tanga ketdangpurtem rongdak senden ka ayongzüka amen, aser iba senden nung züngsemtemi Monupii/May 28, 2018 nü agitsü aliba Lok Sabha election atema meranga inyaktsü bangzüngogo, ta tanü Press Secretary, NDPP 5 Ghaspani-II A/C, Thejangukho Yalietsu-i sangdong ka nung metetdaktsü.
Monupii 18, 2018 nü Ward 5, Medziphema Town nung ayongzükba senden nung o jembirtem rongnung General Secretary (NDPP Central), Miathou Krose densema liasü, aser pai PDA sorkar indang Common Minimum Program nung aliba onüktem metetdaktsü.
Okila jembidang Krose-i lenirtem dang candidate atema nüboyimba mapang osang shidak lemsatepsü atema ayongzük. Paisa, tanü Centre nung Naga nunger atema jembitsü asoshi par candidate kanga tetemsü, ta metetdaktsü.
Monupii/May 28 nü agitsü aliba election dak sendakba nung o jembirtem rongnung Dosau Kuotsu, President, 5 Ghaspani-II A/C, Keviyanei Tepa, Vice president, Central; Gohu Vüprü, NDPP Founding member; Tokihe Zhimomi, Gen. Secretary; Ashito Zhimomi, Zhatuo Kimho, Regional representative, Huska Zhimomi aser party nung lenir taintem liasü.
Ghaspani-II nungi MLA aser NLA nung Dy. Speaker, Zhaleo Rio-ia party nung inyakertem dang PDA sorkar asoshi aser Naga nunger ajangzüktsü atema shima aliba candidate, Tokheho Yepthomi asoshi ajaki longjemer inyaktsü ayongzük.
Rio-isa, “Naga nungeri India sorkar den tatembangbuba onük latettsü atema akhangba mapang ka nung asenoki nübur atema inyaktsü melungteta alisang Tokheho ama lenirtem nüngdaker,” ta ashi.
Paisa, PDA-i Common Minimum Program nung aliba onüktem kanga tongtibangsüa inyaktsü, ta metetdaktsü.
Nüburtem taginüba nung ajemdaker Rio-i, yimtenren den tamangba yimsü sendaktepa mali, ajisüaka nüburtem makmakshimakdaktsütsü atema kari tajangzük bushia olulu proktsüa akok, ta ashi.
O tembanga Rio-i, party nung inyakertem aser nungitertem dang parnok nükjidong nungi masetshitsü aser PDA sorkar tashi itshitsü atema vote agüjang, ibaji ajanga temelenshi bener arutsü, ta metetdaktsü.