Parliament nung Naga nunger meyongtsü khuret nungloktsü nung tasü ita nokdaker: C Apok Jamir

Mokokchung, May 18: Aruya aliba Lok Sabha by-election atema Naga People’s Front (NPF) party nungi candidate C Apok Jamir-i Hokolbarnü Longjang yimtak nübuyim sentong nung jembidang, ‘Parliament nung Naga nunger meyongtsü nungloktsü nung tasü ita nokdakba metetdakja, Naga nunger atema Political telemtetba ka dangi arutsü mapang anasabai arudang Parliament nung alitsüji kanga tongtibang’ ta ashi. Paisa, “Naga yimten kenoji Parliament nung latettsü aser idangji asenoka yangji densembaja maongka tulu asütsü,” ta ashiba den Naga nungertemi pa nem maneni yimli tajung agütsütsü teimla lemsatep.
Kasa sentong nung NPF MLA aser Lok Sabha by-election atema Mokokchung incharge Imkong L Imchen-i jembidang, ‘yim telongjem meraksai Parliamentary election nung Naga nunger aser Longjang nunger ajaki shilem tajung agitsü’ ayongzük.
Sentong nungsa NPF Mokokchung Division President Moasangba Jamir-ia, Naga nunger anir yimsüsüa aruba yimti maneni ajak den amalitepa aotsü ayongzük.
C Apok Jamir ya Nagaland nungi 1998-2004 tashi Rajya Sabha züngsem inyakdanga arur nübu ka lir.
Nagaland nungi taoba Lok Sabha züngsem Niephiu Rio kümsük metembangjungi State politics dangi meyipa arudokba ajanga Nagaland nungi Lok Sabha menden azüngtetatok aser iba ajanga Lok Sabha (Nagaland) menden atema by-election agitsüsa akümba lir.