NPCC-i Karnataka Governor aser BJP aitsür, NPF metentsür

Dimapur, Monupii (May) 18 (TYO): Karnataka Governor Vajubhai Vala-i Linük Temzüng anema Karnataka nung nübo agi mabensaba BJP nem sorkar akümtsü tashi agütsü ta tanü Nagaland Pradesh Congress Committee (NPCC)-i ashi.
BJP ama minority party mesüra single largest political party nem sorkar akümtsü maongka agütsüra, Manipur, Goa aser Meghalaya nung aser Nagaland nunga NPF nem sorkar akümtsü maongka agütsütsüla. Kechiba Karnataka nung inyakba amaji tanga state tem nungbo meinyaker? ta Congress tir K Therie-i ashi.
India Linük Temzüng Tapak IV nung Governor ka indang teinyaktsü jungjunga lateta lir saka Vala-i Centre nung BJP sorkari tuyuba sülen ‘robot’ ka ama inyak. Karnataka Governor-i temzüng alema inyakba aser Centre nung BJP sorkari democracy samatsüba khukhua aitsür ta Therie-isa ashi.
May 28, 2018 nü Nagaland nung Lok Sabha by-election atema Therie-i “Congress-i opposition NPF den olemtep aser telemsa adokdaktsüba teloktem anema secular front candidate ka toktepdaktsütsü atema jembi saka NPF-i Congress den masüngdangtepi C Apok Jamir shim” ta ashi.
Congress party-i nübortem taginüba aser Arrla 371 (A) kümzüka ayutsü atema taruba by-election nung NPF candidate pusema nungittsü telemtetba agi, ta paisa shisem.