NPP Mokokchung Divison-i LS by-election atema renemshir

Mokokchung, May/Monupii 20 (TYO): Monupii/May 19, 2018 nü division office nung National People’s Party (NPP), Mokokchung division-i wings balala- Parents’, Women’s aser Youth wing den co-ordination senden ka menogo, ta tanü NPP, Mkg Div/ Youth Wing Tir, Jonathan Lemtur aser tongti tezülur, Talitemsu Imchen nati sangdong ka nung metetdaktsü.
Monupii 28, 2018 nü agitsü aliba Lok Sabha bye-election atema renemshiba dak sendakba nung coordination senden ya ayongzüka menogo.
NPP Division-i PDA consensus candidate, Tokheho Yepthomi nungiter aser taruba bye election nung PDA nungi candidate-i takok angutsü atema nendaka inyaktsü bangjema liasü.
Iba dak sendakba nung division-i wings balala nem mapa lemzüktsü aser office ketdangpurtem aser party lenirtem dang PDA indang ‘Temelenshi arudar’ yimyim nung ajemdaker nüboyimtsü metetdaktsü.
NPP, Mokokchung division-isa Chief Minister Neiphiu Rio-i Wb. Imnatiba (22 Arkakong A/C nungi MLA) nem Advisor Industries & Commerce, NIDC agutsüba aser DPDB Mokokchung Chairman shimba atema pelaba metetdaktsü.
NPP, Mokokchung division-isa, PDA sorkari nangzükbatem inyaktsü, talisa MLA Imnatiba (Advisor)-i Naga nunger taginüba ataloktsü atema inyaktsü tamang akar, ta sangdong nung shia lir.
Ano külen NPP Mkg division-i party züngsem tasenpurtem agizükba den külemi NPP, Nagaland Unit Tir, Ato Yepthomi aser NPP National Tir, Conrad Sangma na leniba kübok NPP tangatetba nung inyaktsü bangjemogo, ta kasa sangdong ajanga metetdaktsü.