Nagaland nung AIDS ajanga nisung 1521 süogo

Kohima, Monupii (May) 20 (TYO): 1999 nungi Nagaland nung AIDS ajanga nisung 1521 süogo aser tanü 35 buba International AIDS Candlelight Memorial amungdang iba khuret nokdangtsü atema sorkar dang mapa inyakang ta tayongzükba agütsüogo.
Nagaland Legislators Forum on AIDS (NLFA) aser NSACS dena sendaktepa alirtemi mapa inyaktsü atema ayongzük.
State sorkar department aser talisa Nagaland State AIDS Control Society (NSACS)-i International AIDS Candlelight Memorial asoshi ola madoker saka tanü HIV/AIDS dak sendakba teloktem longjemer RHFPC Satellite Centre, Kohima nung tasürtem bilemteta sentong ka agi.
Iba anogomung ya ARK Foundation, Kripa Foundation, Kohima Users Network, Nagaland Users Network, Network of Naga People Living with HIV/AIDS (NNP+), Kohima NNP+ aser FPAI Nagaland Branch teloktemi ayongzük.
Access to Rights and Knowledge (ARK) Foundation Tir, Ketho-i o jembidang “1999 nungi March 2018 tashi Nagaland nung AIDS aketer 23,163 lir. Asenoki mapa tajung inyakogo ta meshitettsü kechiyong asenoki tajungba inyaktsü nündgaker” ta ashi.
March 2018 tashi nung ART nung people living with HIV 16,983 züluoka lir aser parnok rongnung nisung 11,444 dang ART nung dena lir. Parnok rongnungia nisung 7290-i dang ART agir, ta Ketho-isa metetdaktsü.
1999 nungi Nagaland nung nisung 1521 tashi AIDS ajanga taküm samaogo. NSACS aser Revised National Tuberculosis Control Programme tsüngda aser ano AIDS atema inyakba NGOs den health department tem tesentaktep yur mapa inyaktsü nüngdaker, ta paisa ashi.
AIDS agi shiranga asüba noktangtsü atema mapaji NSACS-i masü saka NLFA-i tongti süa inyaktsüla. AIDS anema inyakba mapa asoshi sorkari küm nung lakh ka agütsüba dak alia küm piyong ola madoki yutsüba ajanga kecha masütsü, ta Ketho-isa shisem.
Chief Minister-i AIDS council indang senden ka ayonga amentsüla aser NSACS o NLFA-ia AIDS ajanga asüba noktangtsü atema mapa inyaktsüla, ta paisa ayongzük.
Sentong nung senior journalist H Chishi-ia o jembidang HIV ajanga rongsenkettsüng nunga timtem agütsür kechiyong tanga tashidaktem ama masü saka AIDS ajanga nisung ka mapa inyaktsü mapa tajungdang kongshir ta ashi.
Arishi küm 15 nungi 50 tsüngda alirtemi pei kibong aser lokti atema mapa inyaker aser tanur aser taintem item arishi tsüngda alirtem teyari nüngdaker, ta paisa ashi.
Nagaland nung HIV/AIDS azüoktsü atema olen kar ashidang Chishi-i sorkari inyakba mapa kar indang lemsatep.
2030 tashi nung HIV/AIDS samatsütsü alizüng yur yaküm World AIDS Day nung sorkari Mission SAMPARK tenzükba indang paisa metetdaktsü.
N-NagaDAO tir, Abou Mere-ia ashiba agi, taoba mapang PLHIVs pur bendanga amshi aser loktiliba nungi züngdok saka tanübo iba inyakyim mali kümogo.
Arogotemi HIV/AIDS indang osang prokshiba atema Mere-isa pelaba metetdaktsü saka state sorkari HIV/AIDS atema teinyaktsü meinyakba atema mepelaba shisem.
Nagaland nung taoba mapang HIV/AIDS anema inyakba mapa ya ‘mission mode’ nung inyak saka tangbo ‘project mode’ nung inyaker. Iba ya meyipa reprangshitsüla kechiyong HIV/AIDS ajanga shinga mebendanger aser nisung mashi ka dak iba agi atongtsü akok, ta Mere-isa ashi.
“Tanü alima nung nisung million 37 shi dak HIV keta lir anungji iba atema alimai tarutsü putu nem teimla tasen ka agüja mapa inyaktsü nüngdaker” ta Nagaland Network of PLHIV tir, Lanu-ia ashi.
Iba sentong nung Union Baptist Church Pastor , Rev Dr Rachulie Vihienuo-i temoatsü meshia sarasadem aser Kezevino Sogotsu-i ken ka aten.