Kerala nung Nipah Virus agi nisung asem asü; Centre-i Team ka yokogo

Thiruvananthapuram, Monupii 21 (Agencies): Kerala nung tashidak tasen “Nipah virus” agi nisung asem asüba sülen Centre sorkari team ka state-i yokogo.
Iba tashidak ajanga Kerala kübok Kozhikode nung nisung asem asüba osang jangjaogo.
Iba tashidak agi shirangba temaitsü balala ajanga aika süogo ajisüaka iba tashidak ajanga asüba asü masüar mejangjar; ibaji jangjatsü atema medical test agitsü nüngdak, ta ketdangsertemi metetdaktsü.
Yashi Union Health Minister, JP Nadda-i twitter ajanga, pai central disease control tentet nung tongti dang Kerala semdanga nüngdakba meratem agia inyaktsü tuyuogo, ta metetdakja liasü.
Ano National Centre for Disease Control Director leniba nung telok ka Kerala-i oa state sorkar den yaritepba inyaktsü sentong yangludar.
Kerala Chief Minister, Pinarayi Vijayan indang office ajanga state tesem ajaklen iba osang sangdongogo aser iba tensa azüoktsü atema sorkari ghonda 24 control room ka lapokogo, ta metetdaktsü.
Kerala nung Nipah virus agi asürtem rongnung nisung anabo adianu liasü aser tanüngba kaji tena hospital nung semdanger par kinünger tetsür ka liasü, ta Additional Director of Communicable Disease (Kerala Government), Dr. Reena-i metetdaktsü. Iba tashidak agi yashi nisung ka asü aser tanü ana süogo, ta Chief Minister’s office ajanga metetdaktsü.
Ano nisung ti Nipah virus agi shiranger südi ta melung melemi Kozhikode Medical College nung aliba ward temeja ka nung yaridar, ta Dr Reena-isa metetdaktsü.
Iba dak sendakba nung Kerala sorkari nija hospital ketdangser ajak dang shiranger ajak agizüka yaritsü tuyuogo.
Nipah virus mesüra NiV infection agi shirangba temaitsütem rongnung- tangu sashiba timtem, tekolok awakba, temang metaba, tekolak menüba aser mangmanga anünüba densema lir.
Tang tashi nungbo iba virus atema vaccine mali, ta WHO-i metetdaktsüogo.