Pakistan-i yimjung atema jembira agizüktsü: Sitharaman

New Delhi, Monupii/May 21 (Agencies): India aser Pakistan tsüngda yimjung atema Islamabad nungi yimjung oren kar danga jembira ibaji süoki ia agitsü, ta tanü Defence Minister, Nirmala Sitharaman-i metetdaktsü.
Pakistan Army tongtii linük ana tsüngda mangatettep onüktem atema olen ka jembiba nung ajemdaker Defence minister-i iba o ya jembiogo.
Minister-isa, sorkari temeshi ita Ramzan mapang nung Jammu & Kashmir nung sepaitemi operations maotsü sangdongbaji armed forces-i akhümtsübutsü, ta ashi.
Tanü New Delhi nung osangbenertem den jembidang lai, “Yimjung aginüba olen ka dang jembira ibaji India-i süoki ia agitsü,” ta ashi.
Taoba ita Pakistan Army tongti, Gen Qamar Javed Bajwa-i, linük ana tsüngda ken o jembiba ajanga Kashmir onük densema tanga mangatettep onüktem latettsü koka lir, ta jembia liasü.
Tawa Pakistan-i ceasefire ozüng alema aiaben inyakba aser India-i Ramzan mapang nung Jammu & Kashmir telungpur anema operation maotsü sangdongba dak sendakba nung tasüngdangba ka langzüdang Sitharaman-i, Centre-i sangdongbaji armed forces-i akhümtsübua inyaktsü, ta metetdaktsü.
“India sorkar tenüng nung Home Ministry-i sangdongbaji onoki akhümtsübua inyaktsü,” ta laisa ashi.
Tanü New Delhi nung Artificial Intelligence seminar nung jembidang lai Army, Navy aser Air Force nung Artificial Intelligence ji kanga nüngdak, ta jembia liasü.
Laisa, chemical, biological aser nuclear raraba osettem mitba nung artificial intelligence amshitettsü, ta ashi.
Taoba hopta Home Ministry-i, temeshi ita Ramzan mapang nung security sepaitemi Jammu & Kashmir nung operation maotsü, ajisüaka sepaitem anema inyakra ibajibo meyiptsütsü, ta sangdonga liasü.
Jammu & Kashmir Chief Minister, Mehbooba Mufti aser opposition National Conference lenir, Omar Abdullah natia Centre-i sangdongbaji pelaa agizükogo.