Secular tashi longjemer C Apok Jamir yaridi: K Therie

Dimapur, Monupii (May) 21 (TYO): Lokti nung telemsa adokdaktsürtem ket nungi Nagaland kümzüktsü atema secular tashi ajak longjemang ta tanü NPCC tir K. Therie-i tayongzükba ka agütsü.
Pfutsero (Phek district) nung Lok Sabha by-election atema nüboyimba sentong ka nung Therie-i NPF candidate C. Apok Jamir aser NPF lennirtem den külemi sabang ka nung shilem agi aser idangji Congress-i NPF candidate pusema nungittsü lemtetba indang osang metetdaktsü.
“Telemsa adokdaktsür ket nungi Nagaland kümzüktsü tebilemtsü ajanga onoki (Congress) 2018 Lok Sabha by-election nung C. Apok Jamir yaritsü lemtet” ta Therie-i ashi.
“Yimten tsütsü mangatettep ajak toktsür secular tangatetba nung tentetba political party ajak longjemer Hinduism benoktsü merangba mapa tamakok ngudaktsütsüla. Tsüngremi asenok nem moatsüba lima nung asenoki Hinduism maitdaktsütsüla. BJP ya Naga nunger atema political party ka masü saka parnoki Hindutva tangatetba bener lanurtem ratadaktsütsü atema asen limai aruogo” ta paisa shisem.
Naga nunger lanur aika RSS-i parnok indang school tem nung yaria züngdaktsür aser karbo minister tem kümogo. NDPP ya tawa ang tentetba telok ka aser BJP den tesentaktep yangluogo, parnoka BJP den tepila kecha mali, ta Therie-isa metetdaktsü.
Congress-i secular aser democratic tangatetba nung noktaker inyaker aser BJP-i Uniform Civil Code latettsü atema inyakba mapa anema noktaker. Parnoki BJP RSS telatetbatem kübok linük yunür, ta paisa ashi.
NPCC Tirisa BJP aija, ‘tang India nung nisungtem madak nashi temaba jenjang nung yua lir” ta ashi.
2019 küm India nung secular party tem longjemer BJP agientsü, ta paisa shisem.
BJP-RSS aser parnok den yaritepba teloktem ya zübazüba teyutsü, kechiyong iba ajanga tarutsü nung asen Naga loktiliba nung aser linük ajunga nung teraksa jenti bentsür arutsütsü, ta Therie-isa ashi.
Sentong nung MLA Yitachu-i Rio-i aniba PDA sorkar dang kechiba parnoki ‘Temelenshi arudar’ ta asüba yimyim mapa agi inyaka mesayuteter ta asüngdang.
PDA sorkar ya parnok tashi mait nungi jenbutsü atema tangar majung jembiba sorkar ka dang lir. Rio ya sen tashi agi lenisütsü tashi anguba lennir ka lir, ta Yitachu-isa shisem.
“Rio-i Visasolie Lhoungou aser par adianu Chupfhuo nungi pa indang assembly menden alizük. Tetsür kati independent candidate ka ama tokteptsü atema nomination papers agütsütsü aliba Rio-i rakzük” ta paisa aitsü.
“Lennir kati yamaji inyaker asü? Kodang nungi lennisüba menden sen agi alizüka inyaktsü tenzük? Iba amai lennisüba mapa alizükteter asü?” ta Yitachu-isa asüngdang.
BJP-i Naga yimten latettsü atema election agitsüla ta yimyim ayimoktsü saka tanü sorkari Naga yimten tebilemtsü atema ola madoker, ta paisa shisem.
Yitachu-i Nagaland nung alirtem dang C. Apok Jamir nem vote agütsütsü mepishi aser Centre nung Naga nunger tenüng nung noktaktsü atema pa ya tetemsü nübok ka lir ta shisem.
Sentong nungsa NPF candidate C. Apok Jamir-i nübortem dang pa nem vote agütsütsü atema mepishia metetdaktsü.
“Nü indang senti vote ka ajanga asen tarutsü lenmang yanglutsü, vote ka jagi asenok Naga nunger ta sayutsü. Anungji nenokia Naga nunger atema inyaktsü renema lir mali?” ta Apok-i ayongzük.
Sentong nung mendenji NPF Phek Division tir Chivotso Nienu liasü aser NLA Ex Speaker Thenucho, MLA Dr. Chotisuh Sazo aser Convenor Campaign committee & Working President, NPF Apong Pongener nungertemia o jembi.