HD Kumaraswamy-i Rahul aser Sonia Gandhi na den ajurutep

New Delhi, Monupii (May) 21 (Agencies): Hombarnü Karnataka nung Chief Minister inyaktsü alisang HD Kumaraswamy-i Delhi nung Congress lennirtem- Rahul aser Sonia Gandhi na den ajurutepa cabinet aser minister menden lemsatsü atema jembitep.
Tanü JD(S) tanishir Kumaraswamy-i Delhi semdangdang Congress den sorkar akümtsü dak sendakba onüktem lemsatep.
Kumaraswamy-i teloktep sorkar ketdangsüaka Karnataka legislative assembly nung JD(S) dang nungi Congress züngsem anasü agi teimba lir.
Kumaraswamy-i Congress lennirtem den majurutepdang tamasa BSP tanishir Mayawati den ajurutepa liasü.
Osangbenertemi Kumaraswamy dang deputy CM shimtsü atema asüngdangdang “Rahul-i teinyaktsü ajak renemogo” ta pai langzü.
“Rahul-i Congress Karnataka general secretary KC Venugopal dang onük ajak jembitsü aser telemtetba agitsü atema tashi agütsüogo. Asüng parnok adenshia telemtetbatem agitsü” ta paisa ashi.
“Tanü nikongtsütsü ni H D Kumaraswamy den senden tajung ka menogo. Künati Karnataka nung yimten tensa aser tanga onüktem lemsatep. Bodbarnü pai Karnataka nung CM inyaktsü atema tezüngzüktep agidang ni adentsü” ta Rahul Gandhi-ia Twitter nung metetdaktsü.
Kumaraswamy-isa ashiba agi, tezüngzüktep agiba sentong nung Sonia Gandhi adentsü.
May 23, 2018 nü Kumaraswamy-i tezüngzüktep agiba sentongji opposition party temi tashi sayuba sentong ka ama asütsü.
HD Kumaraswamy-i Bodbar nikongdang 1:30 ako meta tezüngzüktep agitsü imlar.
Sonia Gandhi, Rahul Gandhi, Mayawati, Akhilesh Yadav, Arvind Kejriwal, Chandrababu Naidu, KCR, Mamata Banerjee, Farooq Abdullah, Sitaram Yechury, Pinarai Vijayan aser Tejaswi Yadav nungertem sentong nung adentsü jaokogo, ta Kumaraswamy-i ashi.