UDP, MDA lennirtemi Ampati nung NPP candidate atema nüboyimtsür

Shillong, Monupii (May) 23 (Agencies): United Democratic Party (UDP)-i NPP aser tanga teloktem den lokteper sorkar akümba ya kümsük tembanga inyaktsü ta Revenue Minister Kyrmen Shylla-i tanü Ampati constituency nung ashi.
“Onoki NPP aser tangartem den tesentaktep yangluba raksatsütsü temerang. Onoki Congress telok metsübur. Onok külemi noktaktsü aser Meghalaya tejakleni anir aotsü aser azükarutsü atema inyaktsü” ta Shylla-i ashi.
Ampati constituency kübok Murchapani aser Garabokmangre nung election nüboyimba sentongtem nung pai iba olen jembi.
Tanü NPP-i nüboyimba sentongtem nung Meghalaya Chief Minister Conrad K. Sangma, C&RD Minister Sniawbhalang Dhar, Government Chief Whip Agatha K. Sangma aser Khasi o Jaintia Hills nungi lennirtem aika aden.
Parnoki NPP candidate Clement G. Momin asoshi vote yimtsür.
Taoba hopta ka shi NPP aser parnok den yaritepba teloktemi Ampati constituency nung mungzüker vote agütsürtem dang NPP den yariteptsü aser Ampati nungi Congress atsüngdoktsü atema mesüzüker.
Ampati ya taoba chief minister Mukul Sangma’er constituency lir.
“NPP atema by-election ya kanga tongtipang kechiyong iba ajanga Ampati-i temelenshi aginür aser ruling tsütsü dennür ta sayutsü” ta Conrad K. Sangma-i ashi.